Tito Miguel

Unsaon man gyud diay pagforgive and forget? Gibiyaan ko sa akong uyab kay nikuyog siya's iyang officemate. Five years among relasyon, nagplano nami magpakasal. Daghan kaayo siya'g saad. Nahulog sa wala ang tanan. Sakit kaayo. Love kaayo nako siya. Wala ko nagdahom nga kalit ra ko niyang biyaan. Ingon sila, dapat forgive and forget kuno aron maka move on. Pero unsaon man nga sakit man kaayo para nako ang nahitabo? Wala sab siya nagsorry nako---dili na gani makontak. Magtuig nako nga broken.

Lyn

* * *

Lyn,

Usa ka rason naglisod ka’g pasaylo ug paglimot sa iya’ng gibuhat kay imo siya’ng gihigugma ug nisalig ka nga kuyog mo sa inyo’ng ugma.

Laing hinungdan kay kalit siya nahanaw, nikuyog sa lain sa wa’y panamilit, pamulong ug pangayo’g pasaylo. Dinhi ka naglungot lungot kay ang abi nimo damgo usa diay ka bangungot. Wa ka kabawos, katulisok o kapaningil sa iya’ng saad. Tinuod, lisod pagpasaylo sa tawo nga wala mangayo niini. Apan ihatag gihapon, dili ngadto niya, kun dili para nimo aron malingkawas imong kaugalingon sa kasakit ug kapait  nga imo’ng gipas-an sa hunahuna ug dughan. Ang paglabay sa panahon mao’y labing epektibo nga pamaagi paglimot sa niagi. Samtang di pa malikayan ang nahitabo madumduman, dawata ang ngil-ad nga leksiyon aron sa sunod ikaw magmatngon. Tutoki ang nindot nga nahitabo ninyo’ng duha aron di ka sige kao’g ampalaya, wa raba na’y klarong sustansiya. Apan samtang nagbuhat ka niini, pangita’g higala o pamilya nga sa kanunay imo’ng maistorya kay imo’ng kontra karon naa sa imo’ng kahiladman. Ipagawas dayon nimo’g lingkawas.

Tito Miguel