Tito Miguel

From close friends to being strangers. Mao na ang nahitabo namo sa akong barkada. Before pandemic suod kaayo mi, nya nikalit naman siya ka uga og tinagdan nako, hangtud naga gi-seen zone nako niya. Mga three months na.

Unya magsige og post2 nga difficult times reveal who your real friends are. Wala gyud ko kahinumdom nga ni open up siya nako, or nangayo'g tabang. In short, blind ko ngano nikalit ni siya og ka lami! I miss her. What to do?

Mesh

* * *

Mesh,

Sa makausa pa, padalhi siya’g mensahe nga ikaw nagpabilin nga iya’ng higala, nga sa imo’ng bahin wa ka’y nabuhat nga dautan nga nakapalayo niya kanimo. Kun duna man, ma’s maayo imo’ng mahibal-an aron maklaro og makapangayo ka’g pasaylo.

Kun limpyo gyud imo’ng kunsensiya, lagmit kaninyo duna’y nangintriga, o dili ba kaha siya nasakitan sa imong gibuhat nga wa nimo tuyoa. Isip higala, hatagan unta ka niya’g higayon nga imo’ng kaugalingon idepensa. Ang kalit niya pagpalayo sa wa’y abiso dili patas ug makiangayon.

Tabla ra nga gi-ghosting ka niya. Dili kini buhat sa tiunay nga higala.

Busa inig human nimo’g mensahe niya, pasagdi na siya unsa iya’ng sunod buhaton. Kun mohatag nimo’g higayon, maayo aron sa taman magkaistorya mo. Kun dili gihapon magparamdam, pasagdi na lang, tutal gibuhat na nimo ang tanan nga angayan.

Kay wa man ka’y ideya unsa’y nakapabugnaw niya, lagmit mabaw ra ang rason, kay kun lawom pa ikaw mismo nalumos na. Buot pasabot huyang ang haligi nga iya’ng gibarugan sa inyo’ng panaghigala.

Worth it pa ba? Panahon ang patubaga, samtang tagamtama ang lingaw ug suporta sa mga nagpabilin nimo nga mga higala.

Tito Miguel