Tito Miguel

Maayo’ng adlaw! Naa koy textmate. Puros rami taga Mandaue. Nakuha nako iyang number dinhi sa Banat News. Siya si Maricel, 20 years old. Nindot kaayo mi sa text, as in kilig-kilig kaayo. Pero dili man siya makigkita nako, Tito Miguel uy!

Dihay kausa nagsabot mi nga magkita sa mall, didto na kuno siya, pero namuti na lang akong kalimutaw wala man gyud siya mupatim-aw. Pasa man kaayo ni si Maricel, Tito Miguel uy. Kauyabon na kaayo ko.

Ipadayon pa ni nako, or kalimtan na lang nako siya? Nagkasuod na baya unta mi ug MU na. Pero sa text ra gyud tanan.

Jerome

* * *

Jerome,

Kun gusto ka’g tiunay nga gugma, ayaw pangita’g virtual girlfriend. Mao ni si Maricel. Bisan pa duna’y pipila ka mga malamposon’g love story nga nagsugod sa text, chat o dili ba kaha blind date, mas dako gihapon ang purohan nga makakaplag ka’g para imo sa tinuod nga kalibotan. Pero wala’y dautan kun ganahan gyud ka mosuway sa maong pamaagi. Ayaw lang ipataas imong pagdahom ug paghinamhinam. Gani, nakatilaw na ka nga wa siya motumaw.

Kun kiligon ka sa mga pulong gikan sa babaye nga wa pa nimo mahimamat, lagmit nahigugma lang ka sa gugma, dili pa sa kun kinsa imong higugmaon. Batan-on pa ka, ayaw pagdali. Gani, dili angay pangitaon ang gugma, ang para imo maoy mismo motultol kanimo.

Kun wa siya mopatim-aw sa inyong sabot nga personal magkita, buot pasabot para kaniya ang tanan ninyong kalambigitan sa tiaw ra taman. Pero yuna ra, nagpasahay na ba mo sa inyong hulagway sa wa pa mo magsabot magkita sa personal? Kun wala pa, nagsabot gyud mo unsa inyo’ng suoton sa adlaw nga magkita mo aron sayon ra mo mag-ilhanay. Dili ba kaha niadto gyud siya sa inyong sabot, apan wa ka kamatngon nga sa dihang nakit-an na ka niya, niatras siya?

Ayaw kahiubos kun posible maoy nahitabo. Kay usa gyud na ka purohan sa duwa nga imong gisudlan – uyab-uyab sugod sa pulong, mohunong inig kakita sa nawong. Dili pasabot ngil-ad ka’g barug. Gani, lagmit maayo ka’g hitsura ka’y duna kay kumpyansa makigkita niya. Apan posible dili ikaw iya’ng gipangita o dili ba kaha siya mismo nauwaw kay para niya di siya tanto’ng guapa ipares sa imong hitsura. Kun unsa man iya’ng rason, ayaw na’g padayon, kay sa sugod pa lang siya nisimang na dayon.

Tito Miguel