Tito Miguel

Tawga lang ko og Mira, 18 -anyos ug taga Labangon. Akong problema mao nga samok na kaayo diri's among balay kay magsige og away akong mama ug papa. Gubot. Naglisud pami sa among inadlaw-adlaw nga panginahanglanon, magsige pa gyud sila'g away. Mulayas na lang kaha ko diri?

Kuan, akong mama, selosa kaayo. Sige niya'g dudahan akong papa nga adunay kabit. Pero akong papa mangugat gyud nga selos ra gyud nga walay basehanan ang kang mama. Mao na ilang awayan kanunay. Ako na baya nga giingnan akong mama nga dili magpatuyang sa gibati, pero wala gyud gihapon. Samok kaayo sila, magnilabayay pa og mga butang. Unsaon ko mani sila?

Mira

* * *

Mira,

Wala’y pasalig nga imong inahan mosandig, kay ang pangabubho wala sa rason, naa sa emosyon. Mao na nga maski wala siya’y nakitang ebidensya nga imong amahan duna’y lain, iyang imahinasyon maoy magbuhat buhat sa sitwasyon. Hugaw siya’g hunahuna, wala’y sabon para molimpyo ana. Dili nimo kontrolado ang hunahuna sa imo’ng inahan, apan mahimo nimo mapakgang ang iya’ng batasan sugo sa utok nga dautan.

Istoryaha sila’ng duha, paningli sa kalinaw sa inyong pamilya. Ingna imo’ng inahan diha ra siya mag selos kun duna na siya’y klaro nga ebidensiya. Suportahan pa nimo siya pagpakgang sa imong amahan. Apan kun wala, ipatak-om iyang baba ug ipahigot iya’ng mga kamot kay wala kini laing padulngan kun dili ang wa’y hinungdan nga kagubot.  Kun wala’y ebidensiya iyang pasangil, buot pasabot nag himo himo ra siya’g istorya sa hangin. Bakakon ang tawag ana. Kun mangabubho gihapon maski wala’y ebidensiya, ingna imong inahan nga maayo pa buhaton sa imong amahan iya’ng duda aron di siya mahimo nga bakakon. Kun ang pagduda sa imong inahan tungod kay molakaw imong amahan para sa panginabuhian, ingna nga magpundo na lang sa balay imong amahan, siya nay mogawas para sa tanan ninyo’ng panginahanglan. Hagita’g mabuhat ba niya tanan.

Ingna sab imo’ng amahan nga maglikay sa lihok ug pulong nga makapasikad sa pangabubho. Apan lagmit kini wala’y gamit, kay inig usab sa lihok sa imong amahan, magduda na sad imong inahan ngano’ng nisimang sa naandan. Wa’y lusot imo’ng amahan kay iya’ng kontra puro imahinasyon lamang, way basehan kun dili utok sa imong inahan nga nagsalimuang.

Bahari sila’ng duha nga kun magpabilin sila sa gubot nga sitwasyon, maayo pa mobalhin ka sa laing balay. Dili lalim nga ang anak maoy mamadlong ug motul–id sa ginikanan nga puro na tang-an. Nabali ang kalibotan.