Tito Miguel

Maayong adlaw diha kanimo! Ako si Chona, early 30s, married with kids. Housewife ko. Akong bana maoy nanarbaho. Okay mi sauna, but problemado na karon.

Nisulod man gud og bisyo akong bana. Gamay na lang kaayo og i-intriga, naglisud gyud mi’g maayo. Sauna nagbuwag mi ani, kay nagbisyo sab siya. Akong gipalayas. Nisaad nga magtarong na maong nakigbalik ko tungod sab sa among mga anak. Nabut-an apan damtan og pipila ka bulan, nagbisyo na sab.

Mahadlok ko mo report sa police kay gibaharan ko niya nga adunay dautang mahitabo namo. Magduhaduha sab ko kay siya man maoy nangita og kabuhian para namo.  Unsaon ko ni nga mahunong ni or magtarong na gyud ni siya nga tininuod? Kun ipa rehab sab, wala mi ikasarang. – Chona

* * *

Chona,

Wala nimo giklaro unsa’y bisyo sa imong bana. Apan lagmit kini duna’ kalambigitan sa droga kay naghisgot man ka’g rehab. Ang bisyo sa droga dili mawagtang kun dili gamita’g puwersa. Tungod kay na addict na siya, dili kini maminaw og hangyo, hulga, pakiluoy o rason. Posible mosaad mobiya apan magkawat kawat aron lamang makagamit. Gani, nag bisyo sa una apan nibalik ra. Wala kini maundang, ang tinuod kanimo gitago lang.

Naa sa utok iya’ng problema, busa mao ni angay tambalan. Abli ka nga isulod siya sa rehab apan mawagtangan sad mo’g suporta. Dangop ngadto sa inyong tagsa tagsa ka pamilya, labi na sa bahin niya. Isulti inyong kahimtang, isugyot nga kinahanglan siya ma rehab sa labing dali nga panahon. Samtang siya gitambalan, hangyoa sila nga moabaga sa inyong pamilya.

Kun dili siya ma rehab, mosamot iya’ng pagka sugapa, mas dako’ng problema kun hingpit na mawagtang iyang kabuot. Maapektuhan iyang trabaho hangtod nga siya mapapha. Karon gani nikunhod na iyang intriga kanimo tungod sa iyang bisyo.

Magpabilin ba ka sa kahimtang nga sa dautan mao ra’y dangatan o mag agwanta sa pipila ka bulan o tuig nga siya ma rehab apan duna’y dakong purohan mabalik sa insaktong dalan? Lagmit di ka makahukom, kay duna kita’y batasan nga diha na molihok ug mangayo’g tabang kon di na matabang.  Kun di motabang inyo’ng mga pamilya, duna pa’y laing kadangpan ubos sa balaod. Ayaw kahadlok sa iya’ng bahad nga duna’y ngil-ad mahitabo kun ikaw mosumbong sa otoridad. Ang iyang bahad nasinati na ninyo adlaw adlaw, kun wa ka’y buhaton dili kini mahanaw.

Angay ka mahadlok para sa imong kaluwasan, labi na sa inyong mga anak. Kon sa rehab o sumbong magduha duha ka, mahimo ka makigbuwag. Samtang sa bisyo siya napriso, dili na siya amahan sa inyong mga anak ug bana nimo.   –  Tito Miguel

* * *

Tito Miguel

Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas matag Lunes ug Biyernes.