Tito Miguel

Maayong adlaw! I’m Mike. Early 30s nako, single but not available. Bitaw, naa koy girlfriend, Nicole. Early 20s pa siya. Dako dako mi’g age gap but dili issue namo.

Ang ako lang gyung hasulan kay hilig kaayo akong uyab og picture-picture. Tanan namong lihok, picture unya i-upload dayon niya’s FB. Diko ganahan. Gusto ko, kami kami lang—walay mahibaw-nag-unsa mi isip manag-uyab.

Pero, masuko man siya. Manluod. Mao hinuon na among awayan permi. Unsaon nako ni siya pagpasabot nga dili ko ganahan og picture picture? Tambagi ko, Tito Miguel. Salamat!

Mike

* * *

Mike,

Lagmit usa ka rason imong uyab sige’g upload sa inyong hulagway kay batan-on pa siya. Pero dili ang bugtong hinungdan, dagha’y edaran sige gihapon patik og selfie sa social media aron managat og pagdayeg.

Maski di ka komportable sa iya’ng gipangbuhat, timailhan kini nga siya malipayon kanimo ug ikaw iya’ng gipasigarbo.

Wala’y mupakita sa ila’ng hulagway nga naghilak o masulob-on, gawas kadtong mga patagad na kaayo, nga hasta tinai isuka aron ubang tawo kanila mabalaka.

Ayaw ipahunong sa hingpit ang makapalingaw niya. Apan pasabta nga dili sa tanang oras kinahanglan kuhaan mo’g hulagway ug isabwag sa social media, basin mas busy siya sa cellphone kaysa pagtagamtam sa inyong relasyon. Kay ganahan man gyud siya, pagbigyan mo na apan kadto lamang duna’y okasyon, birthday ba kaha o inyong anniversary.

Tungod kay apil ka sa litrato, duna ka’y katungod mobalibad sa pagpakatap nga angay niya respetohon. Kun mata’g segundo kamo iya’ng kuhaa’g litrato ug ipakita sa mga tawo, iya’ng posts mahimo nga ordinaryo, wala’y hinangpon iyang mga higala sa ta’g singko.

Ipaihap pila ra’y tig like ug comment sa inyong mga dagway kumpara sa kadaghanon sa iya’ng friends sa social media. Lagmit di molapas sa beinte porsyento ang modayeg, kasagaran pa komplimento lamang. Mao kini ang ebidensiya nga mga tawo mapul-an na kun wa’y hunong ang pagbaha sa inyong mga nawong.

Pangutan-a duna ba siya’y mga higala nga mangita’g hulagway ninyo’ng duha? Duna ba’y nireklamo nga sila magluya kun di makakita ninyo duha? Lagmit wala, kun duna man, sigurado ang gipul-an mas daghan.

Apan kun di gyud siya moundang, pasagdi na lang. Tutal, moabot ra ang panahon nga siya maluya ug makaamgo nga ang abi niya paghinangop sa mga tawo naa ra diay sa iya’ng damgo.

Tito Miguel

* * *

Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas kini matag Lunes ug Biyernes.