Tito Miguel

Dear Tito Miguel,

Naibog ko sa best friend sa akong uyab. Ug nagpakita sab siyag motibo nga ganahan siya nako. Ako si Jasper, early 20s na, may trabaho.

Three years na among relasyon sa akong uyab. Okay ra baya mi, katagsa rami mag-away ug ginagmay ra sab ang hinungdan maong dali ra mahusay ang problema. Ang ako lang problema usahay, nagkalaay man ni akong uyab uy. Dili na mangariglar sa kaugalingon. Wala pa say nahitabo namo, holding hands ra. Nisamot ka laay.

Iyang best friend, very liberated. Naka-feel ko modutdot sab siya nako. One time ni chat gyud, jam kuno mi kay gilaay na siya. Magsige sab siya'g patagad nako. Kun ako ning sakyan naa gyu'y mahitabo namo. Naganahan na ra ba ko ani niya nagkadugay.

Pero unsaon na lang nako akong uyab nga iyang best friend? Unsay angayan nakong buhaton, Tito Miguel?

Jasper,

Dili pa issue nga gilaay na ka sa imong uyab, ang pangutana kun imo pa ba siya gihigugma. Kun gilaay ka kay taman ra mo holding hands ug di siya tanto mangareglar sa kaugalingon, buot pasabot dili pa lawom imong gugma nga makalumos sa maong mga reklamo.

Inay nga magreklamo ka nga taman ra mo holding hands, ikalipay nga imong uyab dili humok makighilawas. Ang pag-areglar sa kaugalingon sayon ra mapangitaa’g solusyon. Sultihi sa imong reklamo uyab bitaw mo. Apan lagmit kini mga reklamo nidako tungod kay dunay sige’g tintal nimo. Nangita ka’g igong rason aron ikatarungan sa imong pagluib sa umaabot nga panahon.

Kun wa na kay gugma sa imong uyab, ihatag iyang kagawasan sa di pa ka magbudhi. Kun ikaw duna pa’y pagmahal, sa iyang best friend ayaw patintal. Una way sama ang pagbudhi kauban sa iyang suod ug sinaligan nga higala. Ikaduha, ang babaye nga manintal ug mangilog sa uyab sa iyang best friend dili girlfriend material, kun dili sa one-night stand ra taman.

Makig-relasyon ka’g babaye nga hasta iyang best friend iyang gisalikway? Ang iyang pagpanghaylo kanimo, imong uyab dili kapasaylo. Unsa kahay mahitabo kun mahimong kamo unya imo siyang ipaila-ila sa imong barkada, di ba kaha siya makakita’g laing biktima? Timan-i, sa iyang best friend wa siya moila, samot sa imong barkada nga dili niya ig-unsa.   —Tito Miguel