Tito Miguel
Paeta akong asawa uy, magsige man og bagutbot kun gamay ra akong i-intriga nga kwarta kada adlaw! Ako si Tomas, taga Compostela. Kapin 40 anyos na ug aduna mi tulo ka mga anak sa akong asawa. Usa ko ka barbero.
Sauna okay man gyud ang kita namo sa barberohan nga akong gitrabahuan.
Karon nga pandemya na kuwang na kaayo akong madala sa balay. Unya masuko akong asawa nganong kuwang.
Bisa’g unsaon nako og pasabot sa sitwasyon, mo angal gyud siya. Dili gyud siya ka sabot. Mao nga magsige gyud mi’g lalis.
Unsaon ko man kini siya? Asa man tawon ko mangita sa inadlaw nga kinitaan nako sauna nga naglisud man gyud tanang tawo karon?
Dili na lang gani ko mutingog aron dili na mutaas ang istorya. Pero kapoy kaayo, Tito Miguel. Samok ug hasul.
Tomas
* * *
Tomas,
Ang di maminaw’g rason, dalha sa sitwasyon. Kun duda siya sa kantidad sa imong intriga, ingna mokuyog nimo sa barberohan aron iyang maihap pila ka ulo imong gitupihan matag adlaw, ug pila’y nitunol nimo’g tip o pahalipay.
Lagmit di mokuyog kay mauwaw. Busa ingna wa na siya’y katungod moreklamo o magduda pa kay imo na siya gihataga’g higayon nga iyang duda matin-aw taman sa iyang ikatagbaw.
Posible di sad makakuyog kay way mahabilin sa balay.
Iya na na’ng problema pangita’g makabantay sa inyong balay samtang siya naniid kun duna ba kay kuwarta nga sa laing gastohanan gilabay. Basta ang importante imong gipasalig niya nga sa iyang imbestigasyon ikaw andam ug tagana. Nga wa kay gitago maski usa ka dako.
Labing maayo kun mokuyog aron siya mismo maka testigo batok sa iyang duda ug pasangil kanimo. Mokuyog o dili, mao ra na’y uwahing solusyon aron siya makaamgo nga ang kantidad nga iyang gipamugos kanimo naa ra sa iya’ng damgo.
Aron makamata nga ang tanang naandan nausab sa pandemya tibuok kalibotan, apil na ug labi na ang panginabuhian.
Tito Miguel
* * *
Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas kini matag Lunes ug Biyernes.
- Latest
