Tito Miguel

Dear Tito Miguel,

Good day diha kanimo!

Nawad-an nako'g gana sa akong bana. Mura'g wala nakoy gugma niya. Or basin siya sab nawad an na og gana nako. Nihupas na among gugma sa usa'g-usa.

Naa ko sa punto nga I am questioning my self-worth. Wala nay paki akong bana nako. Losyang nako. Nanambok na. Mao siguro nga dili na ganahan akong bana nako.

Among sexlife wala nay lami. Siya ray maniguro. In three minutes mahuman na among engkwentro.

Ambot uy. Muparayeg ko niya like kun kapuyon ko sa mga trabaho sa balay, bantay sa bata, so ganahan unta ko nga hiluton niya, pero mobalibad man. Magbagutbot.  Naunsa man ko? Or aduna na kaha ni lain akong bana? Early 30s paming duha. —Mars

Mars,

Lagmit gilaay na mo sa inyong kaminyuon o dili ba kaha mura na lang mo’g igsuon. Nawala na ang hinam-hinam ug romansa sa inyong relasyon. Sa paglabay sa panahon, ang magtiayon mura na la’g igsuon, di na gani matulog sa usa ka lawak. Apan kahibulongan kay early 30s pa mo duha.

Simang sa naandan aron dili routinary inyong adlaw kay pul-an gyud mo, sama sa pagdate unta apan lockdown pa. Dili ba kaha epekto lang sab kini sa quarantina, nagpundo ra mo sa inyong balay duha. Inay nga magtinutokay samtang nagpaabot sa oras, usba’g plastar inyong mga furniture o appliances, panglimpyo, ilisi ang bed sheets o kurtina aron duna moy bag-o nga makita o masinati sulod sa inyong balay.

Istoryahi inyong estado isip magtiayon, asa na mo dapit, duna pa ba moy kaugmaon. Suwayi’g balik unsay nagpakilig ninyong duha kaniadto. Kun di na gyud mabalik pa, suwayi’g buwag og panimalay. Paminaw kun pangitaon ba ninyo ang usa’g-usa. Usahay kinahanglan magbuwag kadiyot aron makita gikan sa layo ang di na makita sa duol.

Inig sugyot nimo’g trial separation, paniid unsa iyang reaction ug lihok aron masuta kun duna ba’y nag-atang nga lain. Ayaw pangutana, kay di gyud na moangkon imong bana. Gani, kon mangutana ka, magmatngon na siya, samot itago iyang sekreto kun duna man.

Kun mas malipayon mo nga buwag, lagmit nawala na gyud ang gugma ug gana sa usa’g-usa. Dili tungod kay nausab na imong hitsura, kun dili huyang ang pagbati kanimo sa imong bana. Kay kun tiunay pa siya sa sugod, di mausab iyang pagmahal maski ikaw sa kaugalingon karon giluod.

Ayaw pagdali’g buwag sa hingpit kay duna mo’y anak nga mawad-ag usa nga masangpit. Ang inyong problema kay inyong gibati sa usa’g-usa, hunahunaa unsa sad kahay bation sa inyong anak nga gamay pa? —Tito Miguel