Tito Miguel

Dear Tito Miguel,

Tawga lang ko sa ngalan nga Cess. Tulo mi ka magsuon. Ug naproblema ko sa akong maguwang nga bayot kay nakauyab siya og laki unya nag-live in sila. Okay ra gyud ko ana, dawat na nako. Ang nakaparat lang kay naapektuhan ko. Pagpuyo nila sa amoa, napalagpot ko sa akong lawak kay sila na maoy nag-istar. Nireklamo ko sa akong mama, pero wala man siya mukihol. Siguro tungod kay mas dako og sweldo akong maguwang kay namo. So ni utong lang ko.

Karon, ang laki sa akong maguwang, tapulan kaayo. Nagpabuhi ra gyud. Dili motabang sa amoa. Manghilabot pa gyud sa akong mga gamit. Nagpalaban ko sa akong mama. Wala man gihapon siyay gibuhat. Naka feel ko sauna pa gyud sa gagmay pami, naay favoritism among mama. Kina pinanggaan gyud niya among kamaguwangan.

Unsaon mani nako, Tito Miguel? Dili ko muhawa sa amoa kay diha gud ko nagdako, ug dili sab nako sila biyaan.

Cess,

* * *

Ang ginikanan patas nga nagmahal sa tanan niyang mga anak. Tinuod duna gyu’y mas duol niya nga iyang paminawon ug paboran sa pipila ka higayon, apan dili pasabot wala gipangga ang layo niya.

Wala ka maghisgot sa imong amahan. Kun naa siya, ang inyong sitwasyon karon duna’y dakong kalahian. Kun wala, ang imong maguwang maoy nipuli sa iyang katungdanan nga gisandigan sa imong inahan.

Di ka paminawon sa imong inahan, nasuwayan na ba nimo’g reklamo ngadto sa imong maguwang mismo? Pero lagmit di sad ka paminawon, wala gihapo’y mahitabo, samot pa mo magkagubot.

 Kun di gyud ka kaagwanta, balhin usa sa laing puy-anan paglingkawas sa huot nga kahimtang, tutal duna na man ka’y income. Sa imong pagbiya, dili pasabot nilimod ka sa imong katungod. Kini magpabilin maski sa lain temporaryo o permanente ka’ng nibalhin. Dili sad buot pasabot nagpalupig ka sa kapuyo sa imong maguwang, kun dili nihatag lang ka nila’g higayon ug lugar hangtud ilang relasyon mobahar.

Sa imong paglakaw, lagmit mabatyagan sa imong inahan ang kahaw-ang apan sa imong maguwang ang kagawasan. Kun pabalikon ka sa imong inahan, pauli sa kundisyon nga kinahanglan respetohon imong katungod ug kaugalingon. Kun dili, padayon sa laing pinuy-anan nga wala’y estranghero kanimo mamerhuwisyo.

Ang imong maguwang malipay nga ikaw maoy naukang. Apan kay ang kapuyo tapulan man diay, di madugay siya makaaamgo nga nagpatambok ra siya’g botakal. Dili na kinahanglan imong sultian, pasagdi ang panahon kanila mopukan. Labi na kun straight iyang kapuyo, imong maguwang dakong porsyento sa umaabot masagmuyo.

Samtang ikaw duna’y katagbawan nga nabuhi ka’ng nag-inusara apan wala nagpalingla.

Gamita ang maong sitwasyon nga hagit kanimo aron ikaw mas molambo pa, kay kun kana mahitabo na, basin ang inyong panimalay di na nimo mistil lingi-on pa.

Busa, karon ayaw usa’g insistir sa imong gusto ug katungod kay dako’ng gubot mahitabo sunod. Pasagdi ang panahon nga kanila sa insakto motukmud. Imong katungod sa panimalay dili ikalimod, mismo ang balaod kanimo kanunay nanalipod.

Tito Miguel

* * *

Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas kini matag Lunes ug Biyernes.