Tito Miguel

Dear Tito Miguel,

Hugyaw kaayo ka motambag kay sige ko og basa sa imong column mao nga nakahukom ko og suwat nimo.

My name is Ruffa usa ka yadz, (bayut). Lima na ka tuig nga nilabay akong nailaila sa Christmas party si Fernando. Guwapo, taas ug brusko ug lawas kay kanhi nag-training sa military. Pilay dagan sa adlaw,  nag date mi, gani dunay nahitabo namo  sa dihang nag-inom kaming duha.

Nahimo akong kabahin sa iyang pangandoy nga makalarga ug motrabaho sa gawas kay nitabang ko gamay. Pero nikalit og kapaet sa dihang si Fernando nakapamabdos og babaye. Bisan og sakit gikaya nako. Gikuha pakong ninong sa ilahang anak. Go lang gihapon ko. Nawagtang na og kalit ang among communications.

Apan after 5 years nagparamdam og balik si Fernando pero ang among set up mura ko’g kabit. Tago-tago among communication, unya inoras ang panagkita.

Ganahan ko putlon among koneksyon pero ganahan man gihapon ko niya busa magpatintal ra gihapon ko.

Tambagi ko please...

Ruffa

Ruffa

Kun kalit siya nahanaw kaniadto, wala’y rason nga dili niya usbon ang pagbiya kanimo. Wala ba ninyo hisgoti unsay hinungdan ngano nabuhat to niya nimo? Gidawat lang ba nimo siya’g balik sa wa’y pangutana? Kun nagkauli mo nga mura’g wala’y nahitabo, sigurado usbon niya iyang nabuhat kaniadto. Kay di man diay ka matandog, puwede ra ka niya biyaan, balikan ug biyaan sa hangtod.

Iisa imong respeto sa kaugalingon, matagbaw lang ba ka nga itratar niya’g basura unya biyaan nga nag- inusara? Labi na karon nga nagtago-tago mo ug limitado iyang oras nimo, buot pasabot duna siya’y gikahadlokan nga makahibawo sa inyong panagtagbo.

Duna siya’y laing tawo gilingla, lagmit ang inahan sa iyang anak nga imong kinugos. Undang na kay dunay lain masakitan sa inyong binuhatan nga kanimo nakapabuang.

Kun ang imong problema ganahan na unta ka mobiya apan matintal gihapon, sutaon nato unsa may makapadani nimo ngadto niya. Kun ang inyo panagkuyog, hunahunaa nga sa mata’g kinawat nga oras aron magkita mong duha, dunay laing nahikawan og pag-amuma. Kun pakighilawas maoy imong giapas, sa uban mahimo nimong buhaton nga gawasnon.

Lisod sa primero, kay makasinati ka’g kahaw-ang sa imong pagkatawo. Hinumdumi, naka-agwanta man gani ka nga kalit siya nahanaw samtang simple pa inyong situwasyon, unsa pa kaha karon nga ubay ubay na ang lalisonon sa inyong relasyon?