Love Story

Dear Banat News,

Maayong adlaw sa  tanang suki sa nag-una  nga mantalaan sa Sugbo, ang Banat News. Tawga lang ko sa pangalan nga Delina , 28 years old ug nagtrabaho sa usa ka botika.

Permi gyud ko mobasa og Banat News ug dugay na gyud ko ganahan magpadala sa akong love story, pero karon ra gyud ko kalugar og suwat.  Naa nakoy uyab, siya si  Enja, 25 years old ug nagtrabaho sa usa ka restraurant. 

Wala gyud ko nag-expect nga magka-uyab ming duha kay ako ra ba siya nga crush sa una.  Siyempre kutob ra ko ato sa crush kay naa paman siya’y uyab niadtong higayona. Nagkaila mi ni Enja tungod ra pud sa among tagsa-tagsa nga barkada. 

Makulbaan gyud ko kun makasabay  siya og jam sa among barkada. Dili gyud na mawala ang mga  sungog-sungog. Nakaingon gyud ko nga guwapo gyud siyang tawhana maong na-crush gyud ko niya.

Hinuon single ko niadtong higayona maong ako na lang sakyan ang mga sungog-sungog kay nakabantay na man pud ko nga nakauyon ra si Enja sa mga sungog. Nakabantay ko nga gikilig pud siya.

Apan sa akong huna-huna, mura’g dili man maayo ang among gibuhat. Magkatawa ko sa akong friends uy, kabalo baya sila nga naa na’y uyab si Enja, pero ilaha gihapon gitupo nako.

Nanghinaot na lang ko niadtong tayma nga dili makahibalo ang iyang uyab sa mga sungog-sungog.

Moana man sad akong friends nga bagay daw mi ni Enja. Dili daw sila ganahan sa girlfriend ni Enja kay maldita daw ug dili mosabay sa mga laag sa ilang barkada.

Kahibalo ko nga dili maayo apan  wala nako nabantayan nga  anam-anam nami og ka–close ni Enja. Tago-tago lang gyud kay naa baya siya’y uyab.  Niabot sa point nga nahimong mutual  understanding ang among level  hangtud nga nagkauyab.

Kun mag-away sila si Enja ug iyang  uyab, ako ra pud ang tig-comfort niya pero  never gyud ko nitambag nga buwagan niya ang girl kay maluoy pud baya ko. Ako na lang giagwanta nga duha mi kabuok sa kasing-kasing ni Enja.

Medyo under ug tuok kaayo  si  Enja sa iyang GF maong nakahukom siya nga iyaha na lang kini nga buwagan. Pero  nisuway ko og pugong kay basin ako na hinuon ang molabas nga rason sa ilang breakup.

Apan niana siya nga dili ko angay nga makonsensya kay wala daw koy kalabotan sa ilang panagbuwag. Wala ko’y nahimo ug ako  gyud ang gipili ni Enja. Nindot gyud baya sa feelings nga mauyab nimo imong crush.

Human sa ilang breakup, padayon namo nga gitago ang among relasyon  sulod sa usa ka tuig kay dili ko gusto nga makaingon ang mga tawo nga ako ang rason sa ilang panagbuwag.  Hangtud karon, wala kahibalo ang ex-girlfriend ni Enja sa sitwasyon namo sa una.

Sa panahon nga mag-uban sila permi, siyempre magselos ko ug mohilak na lang ko sa tago. Unsaon taman, nisugot man ko mahimong kabit maong barogan na lang gyud nako.

Naabot gyud ang panahon nga akong gipangandoy. Nagbuwag gyud sila sa iyang girlfriend niadtong December 2018. Nasakpan niya ang iyang uyab nga dunay lain.  Nabawsan si Niño sa iyang binuhatan. Ang nakalahi lang kay wala mi masakpan.  Basta karon, happy kay ko sa among relasyon ug amo na kini nga gi-public. Pero wala sila masayod sa gitago namo kaniadto. Mo-request ko sa lyrics ug chords sa Secret Love Song by Little Mix..

Hi Delina! Thank you so much sa imong LOVE STORY! Paabuta ugma puhon ang imong request

Dear HUGYAWnatics, aduna ba kamo’y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story C/o Banat News