Dear Tito Miguel

Dear Tito Miguel,                                                     

Tagoa lang ko sa pangalan nga Libra. Minyo ko ug adunay duha ka anak, 58 yrs old, negosyante ko. Patambag unta ko nimo kabahin sa akong problema karon. Aduna koy gipa-eskwela og high school. Guwapa siya, 16 yrs old. Grade 10 siya karon. Wala masayod ang akong pamilya ani kay sekreto raman.                                       

Sa kadugayan naibog ko niya. Ako siya gipangulitawhan. Wala siya mobalibad ug wala sab siya motando ang amo estado karon mura gyud mi og uyab, gani hasta iya sinena ako sab tigpalet. Kaniadto maghulat ra siya ako hatagan, bisan pila dili siya moreklamo, apan karon demanding na kaayo siya, magsige na lang og pangayo dagko ra ba ang iyang pangayuon. Nya masuko og dili mahatagan sa iyang gusto. Nakat-on na ra ba ko pagmahal ani niya. Nya ining bag-o lang ako nga nasayran duna diay siya’y uyab nga habalhabal driver. Tagdugay gud siya mopauli sa ilaha gikan sa eskwelahan. Tagdugay gud siya mopauli sa gabii. Mao nga gisakitan ko og maayo.

Unsa may akong buhaton? Ako ba ipadayon ang suporta niya? Ug ako sab hunongon sakitan man ko og maayo kay dako na gud ko og gasto niya.  Palihug tambagi, Tito Miguel,  kun unsay ako buhaton. —Libra

Libra,

Dangop og abugado sa uwahi nimo mahibal-an ngano. Sa karon hisgotan nato unsay naa nimo.

Double life. Mao ni imong kinabuhi karon duna kay lehitimo nga pamilya ug dunay gipahipi nga batan-on. Thrilling, apan dili kini makalipay nimo kay wala kay peace of mind. Kahadlok, kay kasagaran niini ends up in a disaster. As a matter of fact, it already is. Negosyante gyud ka, kay masakitan ka’g magbuwag mo kay dako na ka’g gasto niya. Apan dili siya investment, kun dili usa ka bisyo nga moupos kanimo.

Masabtan nga sa imong edad, nangita ka’g self-affirmation to prove to yourself nga duna pa’y batan-ong maanyag nga makagusto nimo. Apan tataw nga gigamit lang ka niya kay gani duna siya’y uyab nga layo ra’g income nimo. Didto siya malingaw, sa imo mangawkaw.

Tingali magdumili ka’g biya, kay di ka palupig sa usa ka habalhabal driver. This is not love, this is about winning. Apan wala’y modaug sa duwa nga dili patas kun dili si satanas.

Biya ug undangi ang sustento. Pasabta siya nga wa moy kaugmaon gumikan sa age difference, pamilyado ka ug duna pa gyud siya’y lain. She still has so much to live for, but not with you, and you have a lot to be grateful, but not for her.

Labaw sa tanan, pagmatngon kay nagduwa ka’g kalayo kuyog ang menor de edad. Hunong na kay delikado ka sa blackmail or kaso for child abuse or seduction. Dakong iskandalo ug ikaw makalaboso.  —Tito Miguel