Love story

Dear Banat News,

Lipay kaayo ko kay nadayon ang akong  plano nga mopadala sa akong niagi nga love story dinhi sa  Banat News! Ako  diay si Childa,  23  years old  ug usa ka AB Finance student.

Kaniadto dili gyud ko ganahan mo-share sa akong past lovelife. Pero nakahunahuna  ko nga okay ra man diay, human na bitaw to. Usa ka  bulan na diay ko nga single ron. Akong katapusang na-boyfriend mao si  Ninj, 23 years old  ug nag-eskwela sa usa ka unibersidad dinhi sa Cebu City sa  kursong HRM.

Wala pa gyud ko totally naka-move on kay bag-o pa baya mi nagbuwag, pero masaligon ko nga makalimot ra ko niya sa umaabot nga panahon. Wala sad koy plano nga makigbalik niya .  Same mi og barangay nga gipuy-an ni Ninj, ug lahi lang among mga sitio.

Dili gyud mi suod sa una apan tungod sa mga sungog-sungog mura na hinuon ko og nadala.

Makaingon hinuon ko nga cute si Ninj  pero putot lang gyud siya. Pero okay ra man kay mabawi raman sa iyang kaguwapo.

Wala nako damha nga modiskarte siya nako seguro na-pressure pud to siya sa mga sungog sa among common friends.

Hayahay baya si Ninj kay ako dayon siyang gisugot  kay lagi nadala ra pud ko sa iyang kaguwapo.

Hinuon makaingon ko nga boutan ra pud siya pero usa sa iyang batasan nga dili nako mauyonan mao ang pagka-adik niya sa online game nga Mobile Legends (ML).

Nakahinumdom na hinuon ko susama mi og situwasyon sa  nabasahan nako  dinhi sa LOVE STORY sa una nga naapektohan ang ilang relasyon tungod ra pud sa laing online game nga Dota.  Sa  karong panahona, ang ML na pud ang kasagaran nga awayan sa manag-uyab.

Maglagot ko ni Ninj, kay kun makaduwa na gani siya og ML, dili nana siya mo-reply sa akong mga chat ug text.

Usahay kun magsabot mi nga mag-date, dili pud madayon kay duna daw siyay kalit-kalit nga ML Tournament.

Makalagot gyud kaayo, hangtud naabot sa punto nga dili nako happy sa among relasyon. Napungot nako og maayo. Moingon ang uban nga gamay ra daw kaayo og rason sa among breakup ug puwede ra daw istoryahan.

Apan para nako, dili nako happy, unsa pa ma’y angayan dugayan? Gikapoy nako  sa pagsige og kasapot niya.  Kulang nalang, kitkiton niya ang iyang cellphone sa pagkaadik niya sa Mobile Legends.   Nasakitan baya ko sa among breakup, pero dili man sad ko ganahan nga magdugay ang akong pag-antos. Sige og hangyo si Ninj nako nga magbalik mi, pero wala nako motubay niya.

Angay hinuon siya malipay kay maka-focus na siya sa pagduwa niya og ML. Sa pagka-karon, nagparamdam kanako ang lain nako nga ex-boyfriend nga si Stanly, ambot kaha kun unsa ang padulngan namo ani. Ang ending ani, basin ako na hinuon siya nga mapanakip-butas. Dinhi nalang ko kutob, daghang salamat sa paghatag ninyo og pagtagad sa akong love experience. Mo-request na lang ko sa lyrics sa Underneath Your Clothes by Shakira.

Hi Childa! Thank you so much sa imong LOVE STORY! Paabuta ugma puhon ang imong request

Dear HUGYAWnatics, aduna ba kamo’y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini: Love Story C/o Banat News