Ang isla maoy atong paraiso

Usa ka mananagat si Anton ug dihang gikusokuso sa makusog nga unos ang iyang pagpanagat didto sa lawod,  nalunod ang iyang sakayan ug siya napadpad ug didto ikadagsa sa usa ka mamingawong isla. Ug sa dihang nakamatngon na siya’g buot ,usa ka matahom nga babaye nga taas og buhok maoy misugat sa iyang panan-aw.  Ingon  sa dili pa siya makalitok og tarong tungod tingali sa kabugnaw sa tubig sa dagat dihang gianod-anod siya paingon sa isla.

“Ako si Adarya ug ako ang nakakita nimo nga nagbuy-od sa daplin sa baybayon. Nia ka sa  isla Lunsay’ng Buwan. Ayaw lang  kahadlok kay mga maayong tawo ang mga nagpuyo  dinhi. Ako ra ug si nanay Aguida ang nia sa among balay...” nagkanayon ang maanyag nga babaye. Ug kay ulitawo pa man si Anton, iyang gipadaygan si Adarya sa iyang gibati, apan gipakyas si Anton sa katarongan gumikan kay may hinigugma na kini.

“Duna na koy hinigugma, Anton. Ang iyang pangalan mao si Amorato. Tagsa ra hinuon siya moanhi dinhi kay usa siya ka  pirata nga ang panginabuhi mao ang pagpanulis sa mga barko,” pahayag ni Adarya.

“Mao ba, okey lang, Adarya. Nahigugma ka man kaha ni Amorato, siya man kaha ang natingban sa imong pagmahal,” ni Anton nga wala motan-aw sa dalaga. Didto niya ilabog ang iyang panan-aw sa halayong lawod.

“Wala, wala koy gugma kaniya. Si tatay ug nanay nako maoy dunay dakong gusto kang Amorato. Tungod sa mga kuwarta nga ihatag ni Amorato kanila ni tatay ug nanay,” nagkanayon si  Adarya. Unya may nagdagan paingon kanila usa ka bayong, ug nagbalita nga patay na si Amorato. Napusilan sa mga navy didto sa lawod. Tungod niini, ingon sa nalipay ang dughan ni Anton.

“Adarya, patay na si Amorato, may lugar na tingali ako diha sa imong kasingkasing, kay kon duna man ugaling, ikaw ug kining isla Lunsay’ng Buwan mao na ang akong paraiso,” sigon pa ni Anton.

“Dili kay imo ra, Anton, kondili paraiso natong duha kining isla Lunsay’ng Buwan — apan mobiya ka dinhi, di ba?” ingon sa nasubo si Adarya.

“Dili, dili ko mobiya dinhi, anhi ko magpabilin dinhi uban kanimo Adarya, uban sa umaabot natong mga anak,” ug gihagkan ni Anton ang mga ngabil sa dalaga. Didto sa sidlakang bahin sa kalibotan misubang ang katahom sa takdol nga Buwan. (Kataposan)