Ampingi ang gugma kong gibilin

Miabot na lang og usa ka tuig apan wala pa gyud si Mitoy sugta ni Alice. Ug alang kang Mitoy bisa’g moabot pa’g napulo ka tuig dili gihapon niya igsapayan ang pagdugaydugay ni Alice sa pagdawat sa gugma niyang gihalad. “Okey lang, Lice, ang  importante nga makita ko ikaw matag adlaw mamisita gyud ko nimo,” ni Mitoy nga nanarapo sa iyang singot nga nanibug-ol sa iyang agtang.

“Ayaw na’g pamisita nako, ha, Mitoy,” ni Alice nga wala motan-aw sa ulitawo. “Dili na ko gusto’g duna pay mamisita nako, kun moanhi ka dinhi sa amo, dili na ko moatubang nimo...”

Miuyon na lang si Mitoy. Apan usa ka adlaw may gisulti kaniya si Kadong nga iyang suod nga higala nga si Franco ug si Alice uyab na. Dinhi ingon sa midat-og ni Mitoy ang kalibotan ug nakahilak siya.

“Ayaw og hilak, Bay Mitoy, lalaki gud ka,” ni Kadong nga nabalaka sa iyang nakita sa higala.

Milabay ang lima ka tuig ug nagkita sila si Alice ug Mitoy. Si Mitoy usa na ka abogado ug si Alice maoy demalas kay wala makatiwas kay gitaban ni Franco ug unya gibiyaan pa gyud dihang nanganak kini.

“Lice, kumusta ka na,” hinay ang tingog ni Mitoy. Iyang nakita nga mora’g gum-os ug midaot na si Alice, dili sama kaniadto nga lumoy ug bus-ok kaayo.

“Nia, Mitoy, demalas ang kinabuhi,” niini pa sa luyahon nga tingog.

“Dili man matawag nga demalas ang imong sitwasyon ron, Lice. Para nako, suwerte hinuon ka, kay bisa’g gibiyaan kang Franco, duna man kay anak, ug anak maoy matawag nga bahandi nimo nga kun ayuhon lang nimo’g padako mahimo hinuon nga maoy maghatag nimo’g dakong suwerte sa imong kinabuhi...” ug gikuptan ni Mitoy ang tuong kamot ni Alice. “Alice, dili pa man ulahi ang tanan, kun napakyas ka adtong lalaking sipat, apan kanako dili gyud kana mahitabo. Sa akong paningkamot, ikaw ang gihimo kong inspirasyon, kay bisa’g wala mo ampingi ang akong gugma nga wala gyud nimo dawata, ako ... ako nagmahal gihapon kanimo, Alice...” (Kataposan)