Bugnaw’ng hangin sa Septiyembre

Unang adlaw sa bulan ug gibati ni Lolita ang kamingaw sa iyang bana nga atua sa Qatar. Usa kini ka Engineer nga kada tuig lang mopauli. Gimingaw na gyod siya kang Alijandro. Buotan si Alijandro natataw gyud niya ang giladmon sa pagmahal niini kaniya.

Gipalitan siya’g kotse, gipatukoran siya’g nindot ug modernong balay sa usa ka mahalong subdivision ug may gisaad pa kini nga mopalit og yuta daplin sa baybayon kay plano niini nga himoo’g usa ka beach resort.  Apan ning ulahing mga adlaw may usa ka guwapong lalaki nga mipadayag sa iyang gibati ngadtong Lolita. Matag gabii, moanhi gyud kini sa ilang balay. Iya gani kini gikasab-an kay basin og dunay makakita ug lainon og sabot sa mga silingan. Apan ingon sa walay kapuol ang magsige’g halad ni Arnold kang Lolita. Busa, ingon usab nga mihumok ang kasingkasing ni Lolita ug mikuyog siya niini sa usa ka beach resort dihang giimbitar siya niini. Didto nangaligo sila ug nakapanglad-ok si Arnold sa kaanindot sa lawas ni Lolita nga wala pay anak.

“Komusta ang gihalad kong gugma kanimo. Lit, may kahayag ba nga imong dawaton sa imong kasingkasing?” mitutok si Arnold sa matahom nga nawong ni Lolita.

“Sorry, Arnold, dili ko makadawat sa imong gihalad nga gugma, minyo ko, ug dili ko gusto nga magbudhi sa akong bana.”

Tuod, wala na moanha si Arnold sa ilang balay ni Lolita. Unya, usa ka hapon nakugang si Lolita dihang may misulod nga kotse sa ilang tugkaran, Unya iyang nakita si Alijandro nga nanaog ug may misunod nga lalaki nga nanaog usab. Si Arnold ang iyang nakita. Si Arnold ug Alijandro! Nagkuyog sila!

“Lolita, love, si Arnold, akong sinaligan sa usa sa engineering firm nako dinhi sa atong siyudad. Ug ako maoy nagsugo kaniya nga tentalon ka, apan wa ka gyod matental ug kini nagpasabot nga buotan kang pagkaasawa, ug labaw sa tanan mahal mo gyud diay ako,” ug gigakos ug gihagkan ni Alijandro ang mga ngabil ni Lolita samtang si Arnold igo lang nagtan-aw. Mapahiyomon. (Katapusan)