Ang saad ni Dolor

Si Dolor karon ang nagbantay sa ilang tindahan nga Sari-Sari Store ug basta gani si Dolor maoy mobantay sa ilang tindahan mohugop dayon sa mga ulitawo diha sa may lingkoranan sa tugkaran sa tindahan.

Naa sila si Otik, Sebyo, Lando, Gingging, Benigno ug Marko. Ug sa tanang mga  ulitawo nga nia karon dinhi sa Marko ang matawag nga suwerte kay anak siya nilang Doktor Gumer ug Doktora Zenaida.

Duna sila’y klinika sa lungsod. Ug dunay daghang kabtangan. Sa laktod nga pagkasulti, adunahan ang mga ginikanan ni Marko, ug si Marko bugtong pa gyong anak. Nahigugma siya kang Dolor apan ang dalaga ingon sa wala’y gusto sa ulitawo, kay ang iyang nagustohan mao man si Liloy nga hilomong ulitawo nga anak nilang Pascual-Rita, ang mag-uuma didto sa Tabok, ang sityo duol sa Suba.

“Sayod kong wala ka pay uyab, Lor,” ni Marko nga dunay gamay’ng pahiyom kinsa miduol sa dalaga diha sa gilingkuran niini sa may tindahan. Nagkantakanta ang mga ulitawo nga giduyogan ni Otok nga maayo kaayong mogitara.

“Duna na man koy uyab, Marko,” pahayag sa dalaga, nagpahiyom kini. “Taga dinhi ra sa among baryo...”

“Dili ko motuo, uy, kay daghan sad nga nahibawo nga wa kay uyab,” mitutok si Marko kang Dolor.

Unya mitumaw si Liloy, may dalang botelya. Miduol siya kang Dolor. “Lor, palita ko’g suka...”

“Unsa mang sukaa, Loy, suka sa lubi o kining vinegar,” ni Dolor nga ingon sa abtik kaayong misulod sa tindahan ug namili sa matang sa suka. Guwapa man sab ni si Dolor, liwat sa iyang Lola Caridad nga may dugo sa Katsila.

“Suka lang sa lubi,” ni Liloy nga medyo gipahinay ang tingog.

Gikuha dayon ni Dolor ang suka sa lubi diha sa botelya. “Lor,” hinay’g tingog ni Liloy. “Mamisita ko nimo karong gabii, ha...”

Dali ra kaayong nakayango si Dolor. Ug nadungog kini ni Marko nga gibati’g kasina. “Kini diay’ng tawhana ang imong giingon nga imong uyab, Dolor, luoya gud nimo, poor man ni siya. Na, o, klaro kaayong binistihan,” ug miduol si Mark kang Liloy gikuwelyohan kini.

“Hoy, hoy, Marko, ayaw’g hilabti si Liloy, uy!” nataas ang tingog ni Dolor. Mipatuo si Marko ug si Liloy mihinay’g lakaw dala ang botelya sa suka, ug milingi kini kang Dolor ug namulong, “Ikaw, ang tanan alang kanako, Dolor...”

“Oo, Liloy, mituo ko nimo. Ako pod, ikaw ang akong...” ug wala madayon ang buot isulti sa dalaga kay miabot ang inahan sa dalaga. Apan pagkasunod adlaw mikaylap ang balita nga si Liloy patay na, may nagtaop nga punyal sa iyang dughan. Ug nagtuo ang kapolisan sa lungsod nga gituyo kini pagpatay.

Tungod sa maong hitabo hilabihang minatay og hilak ni Dolor ug misaad siya sa iyang kaugalingon nga siya’y mobawos sa kriminal, ug sa hilom nagduda siya kang Marko nga mao ang kriminal. (Katapusan)