Idolo

Gula 17

Medyo nakuyawan si Carlo sa tinan-awan sa amahan. Mura'g wala makauyon sa iyang pangutana. "Nganong nakapangutana man ka'g sama niana Carlo?"Matud pa sa amahan nga wala makagusto sa gipanulti sa anak. "Ahm,.kuan pa,.kanang.. kuan..ahmm.," pagkanga-kanga ni Carlo.

"Dili na buhaton sa imong inahan. Dili siya magpakasayop sa pagbuhat nga pagtugbang sa akong gibuhat." Matud pa sa amahan ug gibalik pagpiyong ang mata. "Okay ra diay nga ang bana mangita'g kalipay sa laing binuhat? Wala'y katungod ang asawa nga mangita pud og laing binuhat nga mohatag sa kalipay niini?" Matud pa ni Carlo nga hinay pagkasulti.

"Okay ra nang buhaton basta dili lang mahibawo. Apan dili maayo nga ang asawa mangita’g laing team. Ug ikaw ayaw pagpakasayop sa pagsulti sa imong inahan sa akong mga binuhatan nakasabot ka?" matud pa sa amahan. Igo lang nanghupaw ang ulitawo. Sa huna-huna sakto siguro ang iyang papa. Matag semana manawag nila ang iyang mama mangumusta sa iyang pagtuon ug mangumusta kun unsay gibuhat sa amahan. Apan kanunay'ng gibakakan ni Carlo ang inahan nga nagtarong sa iyang pagka-bana ang iyang papa. Matag buwan magpadala sab og kuwarta ang iyang mama para sa iyang pag-eskwela.

Human sa usa ka oras nga pagmasahe, dihang nabati na ni Carlo ang amahan nga mihagok, ug igo-igo sab nga namuypoy na ang bukton ug buko-buko ni Carlo, giundangan niya pagmasahe ang iyang papa mibarog kini ug gihabolan. Bisan tuod og palikero ang amahan pero pinangga niya ang iyang papa. Bisan usahay makatilaw kini sa kamot sa amahan ilabi nag makasala, pero padayon gihapon niyang girespito ug gipangga ang iyang papa. Nahunahuna usab ni Carlo nga kun wala ang iyang papa wala usab siya niining kalibutana  mahulog nga idolo niya ang iyang papa suod silang amahan ug anak nakita man sab hinuon niya ang pagpangga sa amahan kaniya. Dili pa malimot si Carlo dihang bata pa siya  kun unsay pangayuon niining duwaan nga maibgan ihatag gyud kini sa iyang amahan. Sa makausa pa, bugtong anak lang si Carlo, wala sab siya mahibawo kun may anak ba ang iyang papa sa laing babaye tungod lagi sa pagkapalikero niini.

Mahinumdoman pa ni Carlo, dihang gibunalan siya sa iyang mama kay nabuak ang baso ang iyang papa maoy mipalit ug ang iyang mama ug papa maoy nag-away. Pwerti pang hilak ni Carlo nga giam-aman sa amahan gihagkan, gisabak ug gihapuhap ang nagsakit nga sampot tungod sa pagbunal sa iyang inahan kaniya. Pero dihang nag-edad na siya'g katorse anyos nga mao say paglarga sa iyang mama sa gawas. Unang higayon nga nalamparohan siya sa iyang papa kay nakasala kini gisugo man gud siyag paplantsa sa iyang uniform ug nasunog kini. Dili sab niya mabasol ang iyang papa kay nagdanghag man siya nalingaw sa gitan-aw niining salida sa tv samtang nagpatong ang init kaayong plantsa sa uniform niini. Pwerting pangluod pa ni Carlo niadtong tungora kay wala siya makatuo nga matamparosan siya sa iyang papa kay lagi pinangga siya niini. Ang amahan ra sab ang nag am-am niya. Gipalitan sa unsay gusto aron mawala ang pagpangluod.

Hangtud nga nakaangkon ug kaugalingong pangisip nga ang amahan maoy nahimong IDOLO. Tanang buhat sa amahan  tanang makita niya sa amahan  husto para niya. Kun pagkapalikero sa amahan ang hisgotan nahimong husto alang kaniya gisunod pa gani. Sa sige'g hunahuna ni Carlo ug tungod sa kakapoy sa lawas tungod sa pagmasahe niini sa amahan  nakatulog kini.  Sama sa naandan binlan og kuwarta si Carlo sa amahan, mamahaw ug moeskwela.

Didto sa eskwelahan, napagya ang gibuhat ni Carlo kang Larry. Nasayran sab nga wala diay makaeskwela si Larry. Nagpaabot nga ipatawag siya sa ilang guidance apan wala siya ipatawag. Way reklamo nga mipadangat niini ngadto sa maong opisina. "Wala makaeskuwela kay nabun-og to nimo parts," matud pa ni Vincent.

"Wala ka makakita ni Marissa part?" pangutana ni Carlo. "Tua sa canteen unsa man atong adtoon?" pag-imbita pa ni Vincent kang Carlo. 'Ayaw na diri lang ko mao ra gihapon dili ko hatagan og maayong pagtagad ni Marissa. Labi na karon nga nakasaksi siya sa akong gibuhat kang Larry.

"Mao gyud. Tuod ba lain bay ato mag-outing ra ba ang barkada kuyog ka?" Matud pa ni Vincent. "Mao ba? Asa man?"pangutana ni Carlo.

"Adto ta's Lapu-Lapu, mag over night kuno ta. Ug kuyog nato si Mira." Matud pa ni Vincent. "Mira? Kinsang Mira?" pangutana ni Carlo. (Sumpayan)