Nagtali ang kahilom

Unya, naa na moy lead, Bay Rigs, kinsay mipatay sa imong asawa?” Mabinationg sukna ni Hindo, suod nga higala  ni Rigs.

“Oo, Bay. Nailhan na. Pero untouchable. Super bigat and super yaman!” May lawom nga panghupaw nga gipalid sa halayong unahan.

Sa miaging semana gipatay si Rina, misis ni Rigs, sa nagbonet nga lalaki  samtang nagsakay’g habalhabal. Natusaktusak iyang kalawasan sa mga bala sa magnum 44 nga maoy gigamit sa mamumuno. Hasta, drayber sa habalhabal, nadamay. Patay pud on the spot. Duol man unta sa estasyonan sa mga polis ang nahitaboan, apan dugay nakaresponde ang kapolisan. Wala na diha ang kriminal sa ilang  pag-abot.

“Giunsa man nimo pagkahibawo nga super bigat ug untouchable, Bay?” Palo-ap nga pangutana ni Hindo.

“Sa wa pa gud tong hitaboa, Bay, adunay gitangtang nga dakong tarpulin si Rina nga gipabarog sulod sa among yuta nga walay pananghid namo. Wa abtig semana, may laing tarpulin na pud nga gipatindog nga wa gyud makigsabot namo. Sa kalagot sa akong misis, tabastabason bitaw niya ang tibuok piraso sa tarpulin, nangahibat ang mga nawong sa tawo nga naa sa hulagway, uy!”

“Ah, okay!” Ni Hindo pa nga dali rang nakasabot sa kinatibuk-ang pahayag sa higala. Unya mikomentaryo: “Si... sila diay, Bay? Nakakita man ko ba sa ilang hulagway niadtong tarpulin kay mag-agian baya ko sa inyong yuta? Very untouchable gyud tinuoray, Bay. Pero, di diay ka mosukol nga may kaya man sab ka?”

“Hulmigas lang ko, Bay. Samtang sila mga mangtas nga leyon ug tigre. Mao nga mas maayo pang magpakahilom na lang.” Bugnaw’ng hukom ni Rigs sa dayon na nilang panagbulag ni Hindo og dalan nga gisubay.

Pipila ka bulan human niadto, kalit lang naukay ang tibuok siyudad dihang ang gisakyan nga Pajero sa mayor uban sa danglog kaayong drug lord giambus ug gilabay’g granada sa wala mailhing grupo didto sa hilit nga dapit sa Masanaw, diin tanang sakay, patay.

Samtang didto sa mamingaw’ng lawak, diin nagtali ang kahilom, may anino sa usa ka lalaki nga malipayon ug adunay gitawagan sa selpon: “Good work, Boys!” (Kataposan)