Isla Paraiso

Gula 112

“Rey, kinahanglang mailhan nato sa labing kamaduloton ang usa’g-usa kanato. Kinahanglan nga imong sutaon sa imong kaugalingon kun ako na ba gayod ang the best alang kanimo ug mao usab kana ang akong buhaton,” matud ni sister Veronica.

“Paningkamotan ko nga mahimong takos sa imong gugma ug pagsalig sister Veronica, ug ipangaliya ko sa Kahitas-an nga unta ikaw Iyang ihatag kanako.”

“Kun ikaw ug ako giandam gayod nga alang sa usa’g-usa, mahatagan gayod og katumanan ang maong plano sa Diyos alang kanato. Apan kun dili, dili usab nato angay supakon ang Iyang kabubut-on.”

“Ingon sa dili tingali nako madawat ang kamatuoran kun mawala ka kanako.”

“Dili na lang una kita maghisgot mahitungod niana. Dili nato himuong masulob-on kining higayona.”

“Husto tuod,” mipahiyom og ahat si Rey. “Mianhi man diay tuod kita aron paglingawlingaw.”

Unya, hapit sila magkadungan pagtindog. Milakaw sila. Paingon sa unahan. Nagsubay gihapon sila sa pinong balas nga matahom nga baybayon sa isla Paraiso.

Ug natagbaw gayod sila’g suroy sa maong isla. Wala pa nila malibot ang tibuok pulo sa Paraiso apan mibati na’g pagpanghawoy ang mga tiil ni sister Veronica sa pagbinaktas. Busa namalik na lang sila sa nahimutangan sa pumpboat. -- Sumpayan pa