Pahiyom ni Catherine

Gula 5

Gikalipay kaayo ni Nestor ang pag-imbitar ni Catherine nga paadtoon sa iyang gipuy-an atul sa adlaw niyang natawhan. Naghuna-huna si Nestor kun unsa kaha ang iyang maayong ihatag nga birthday gift sa dalaga.

Nagdali nga naligo si Nestor. Human niya’g ilis, milakaw dayon siya ug misakay sa iyang motorsiklo gikan sa Barangay Kalunasan. Nakahuna-huna siya nga magmotor na lang para madali.

Mihapit si Nestor sa usa ka department store sa Fuente Osmeña ug namili og iyang ikahatag nga gift ni Catherine. Tuod, nakahuna-huna siya nga perfume na lang ang iyang ihatag kay mahimo pa kini nga isulod sa bulsa.

Gusto ni Nestor nga inig-abot niya sa gipuy-an ni Catherine wala kini makita nga gibitbit kay surpresahon niya ang dalaga. Mahal-mahal g’yud ang napilian niya nga pahumot, ug sigurado siya nga malipay niini si Catherine.

Migawas dayon si Nestor sa department store ug miadto sa giparkingan sa iyang motor. Misirit lang siya sa gipuy-an ni Catherine. Wala na siya manuktok pa, mideritso lang pagsulod sa gate si Nestor.

Apan pag-abut niya, iyang nakita si Catherine nga may gikaestorya’ng lalaki diha sa lingkoranan ilawom sa kahoy atubangan sa balay. Mora siya og napaatras, ingon sa kabalikon sa agi si Nestor.

“Uy dia ka na diay Nestor, dali ipaila-ila nako nimo si Bert,” matud ni Catherine. Kalma ang mga lakang ni Nestor nga mipaduol kanila ni Catherine. Mitutok kaniya ang lalaki nga matud pa mao si Bert.

“Mao kini si Nestor, ang bag-o nako nga boyfriend Bert. Siya maoy rason nga dili na ko mosugot nga magbalik pa ta,” giingnan ni Catherine ang lalaki nga daw nanglipaghong ang panagway ug nakapangutkot sa iyang ulo.

Mideritso og lakaw si Bert nga wala na mananghid pa. Sigurado si Nestor nga nasuko si Bert. Apan natulala si Nestor sa iyang nadungog nga gipaila-ila siya ni Catherine nga boyfriend nga wala pa man siya sugta.

Nagpahiyom si Catherine kaniya. “Nakalitan ka nga giangkon nako nga boyfriend atubangan ni Bert? Ako na lang bakwion to,” matud ni Catherine nga nagpahiyom.

Gigunitan ni Nestor ang bukton ni Catherine. Kun gabii pa tingali, hagkan na g’yud ni Nestor ang dalaga tungod sa kalipay. “Salamat nga gisugot na ko nimo Cath ha?” daw gisanapan sa kalipay ang kasing-kasing sa ulitawo.

Mitindog si Catherine ug giagni si Nestor nga manulod sila sa balay. Didto diay nagpaabot ang ka-board mates ni Catherine. Pulos kini nagpahiyom nga mitutok ug daw nanghimbis ni Nestor. - Sumpayan