Mapinanggaon ang Ginoo

Offertory. Giandam ni Evelyn ang sobre nga gisudlan sa iyang halad. Samtang layo pa ang nangolekta, nahinumdom siya na P100 ray iyang gisulod. Nakahunahuna siyang dungagan kini’g P100 aron mahimong P200.

Buotan si Evelyn. Bisa’g gamay ra iyang suweldo kada bulan, bahinan gyod niya ang simbahan kada tambong niya’g misa. Gamay lang tuod kasagaran ang iyang ihulog sa collection bag, apan kinasingksing. Giukban ni Evelyn ang sobre. Dungagan na unta niya kinig P100 dihang iyang namatikdan nga ang tibuok papel de banko nga naa daan sa sulod, P1,000 (usa ka libo ka pesos) diay ug dili P100. Haskang kuganga sa dalaga! Nasayop diay siya’g sulod niini ganina sa wa pa magsugod ang misa. Pastilan, igpapalit ra ba niya kini’g tambal sa masakiton niyang amahan.

Gidalidali ni Evelyn pagkuha ang P1,000 gikan sa sobre ug giilisan niya’g duha ka tag P100. Tayming nga sa pagtak-op niya sa sobra, maoy pag-abot sa tigkolekta diha sa iyang tungod. Gideretso na lang sab niya kinig paghulog ngadto sa sibot.

Pag-abot sa akto sa Liturgy, nangluhod ang tanan. Samtang nagluhod si Evelyn, gitutokan niya pag-ayo ang  ostiya nga gibayaw sa pari. May nakit-an siya - ang buhing hitsura ni Hesukristo nga mipahiyom kaniya. Dihadiha, gibuksan niya’g dako ang iyang kasingkasing ug gipasulod ang Ginoo. Nabati niya ang di matukib nga kalipay nasabtan niya nga ang atong Diyos di gyod mamugos kun pilay ihalad tang kantidad. Gani, dihang nakita sa Ginoo ang hunahuna ni Evelyn nga P200 ra diay ang gustong ihalad sa misa, nangita’g paagi ang Makagagahom unsaon pag-uli ang sobra.

Wala kapugngi ang pagpanailos sa mga luha ni Evelyn. Nasinati niya ang presensiya sa Espiritu Santo. Oo, anaa Kini kaniya.  Nakig-uban Nagbantay. Ug namati sa unsay iyang gusto?

“Oh, Ginoo, pagkamapinanggaon Mo gayod!” Ug gipiyong ni Evelyn iyang mga mata dihang ang kalis sa dugo ni Hesukristo mao na poy giisa sa pari. (Kataposan)