Pit Senyor! Pit Senyor!

Naghuot ang mga tawo sa Basilica del Santo Niño karong adlawa. Kapistahan sa Balaang bata. Sa dalan nagkalandrakas ang tingog sa mga tambol. Nagsugod na ang street dancing sa mga contestant.

Sa gawas sa simbahan, sa may pultahan, ang magtiayong Sandro ug Norma naghalad og kaugalingong sinulog. Nag-undak-undak ang ilang mga tiil samtang sa ilang kamot giwarawara ang gikuptang mga kandila. Nag-ampo sila sa Batang Patron sa siyudad sa Sugbo.

“Pit Senyor! Pit Senyor! Ibalik na kanamo si Rodrigo! Maluoy ka!” Maluoy ka!” Naghilak si Norma, nag-edad og singkuwenta.

“Pit Senyor! Pit Senyor! Gimingaw na kami sa among anak. Dugay na siyang nahilayo kanamo ni Norma. Bugtong namo siyang anak. Kaluy-i siya ug lamdagi ang iyang kaisipan nga magbinuotan na!” Naghilak usab si Sandro, singkuwentay singko anyos.

Nagkaduol ang street dancing sa simbahan. Makabungog ang tingog sa mga tambol. Malipayon ang mga tawo nga nanan-aw. Dunay mga turista, nanganhi gyod sa Sugbo aron pagtambong sa Sinulog.

“Pit Senyor! Pit Senyor! Kaluy-i si Rodrigo!”

“Pit Senyor! Pit Senyor! Mopauli na unta sa among balay si Rodrigo!”

Nagpadayon sa pag-undak-undak sa ilang mga tiil si Sandro ug Norma. Gipaningot na sila pag-ayo. Walay hunong ang pag-agas sa ilang mga luha gikan sa ilang mga mata.

Managsamang nag-opisina ang magtiayon. Haruhay ang ilang pagpuyo kay dagko sila’g posisyon sa gitrabahoang kompaniya. Dagko usab sila’g suweldo. Apan kulang sila sa kalipay, kay ang ilang bugtong anak nga si Rodrigo, wala magtinarong sa pagtungha. Nabuang sa barkada ug mga bisyo. Babaye. Sugal ug inom. Hangtod nga miundang kini sa pagtungha. Milayas. Lima na ka tuig nga nahanaw. Walay kasayoran si Sandro ug Norma kun hain kini, kun unsa nay nahitabo niini.

Lapoy ang kalawasan sa magtiayon nga mipauli. Huyhoy ang ilang mga abaga. Nagmingaw ang ilang balay. Walay timailhan nga mipauli si Rodrigo.

“Wa dungga ni Santo Niño ang atong pag-ampo, Sandro.” Namahid si Norma sa iyang mga luha nga milingkod sa taas nga sopa.

“Di ta magpawa’a sa paglaom, Norma.” Mitupad si Sandro paglingkod sa asawa.

“Pa! Ma!”

Nagkadungan paglingi ang magtiayon sa gigikanan sa tingog. Puwerte nilang lipaya pagkakita sa ilang anak nga migawas sa lawak niini. Nagdungan ang magtiayon pagduol sa anak. Nagginaksanay sila.

“Pasayloa ko ninyo, Pa, Ma.” Naghilak si Rodrigo. “Nagbasol na ko sa akong mga sayop. Magbinuotan na ko.”

“Salamat, anak, nga mipauli ka.” Hapit dili mobulag si Norma sa paggakos kang Rodrigo. Puno sa kalipay ang iyang dughan.

“Karon nga nia ka na, Rodrigo, magselebrar ta. Maghikay ta sa imong pagpauli. Pista karon. Mag-order ko’g inasal nga baboy ug uban pang mga pagkaon. Saw-an nato kini uban sa atong mga silingan.” Walay kabutangan ang gibating kalipay ni Sandro sa iyang dughan.

“Pit Senyor!” matud ni Norma nga mapahiyumon kaayo.

“Pit Senyor!” tubag usab ni Sandro.

Hilom nga nagpasalamat ang magtiayon sa Balaang Bata kay gidungog niini ang ilang pag-ampo. (Kataposan)