^

Banat Kalingawan

Sugilanon: Mangalagkalag ta, pa!

- Ni Don K. Depariene/Cebu City -

Nakapanglingo si Ramon. Naatol gyud nga gihilantan siya atol sa kasaulogan sa Adlaw Sa Kalagkalag. Wa siyay kondisyon sa lawas. Unang higayon nga wa siya makapangalagkalag sa probinsiya uban sa bugtong niyang anak sa ilang baryo sa Sab-a, nga nahisakop sa lungsod sa San Remegio, amihanang probinsiya sa Sugbo.

"Mangalagkalag ta, Pa...!" maoy nasawod sa pandungog ni Ramon ning buntaga ang gipamulong sa bugtong niyang anak nga si Jorge, nga sa iyang edad nga 12, ug moggradwar na sa publikong elementaryang eskuylahan sa siyudad ning tuiga, maoy kaabag niya sa panginabuhian ning ilang dapit sa eskuwater.

"Human na kag panuroy og Banat News, Dong Jorge...?"

"Naka-remit na ko, Pa! Dia na ang komisyon ko! Giibanan nako sa pagpalit og pansit ug kan-ong humay...!" nagpahiyom si Jorge nga mipahimutang sa dalang putos nga bulsita sa gamay nilang kan-anan sa sulod sa ilang barungbarong.

"Di diay ta mangalagkalag sa probinsiya, Pa...?"

"Gihilanat ko, Dong Jorge! Anhi na lang ta managkot sa sam-ang sa siyudad...!"

"Sadya ug alegre unta kaayo nga mangalagkalag sa bukid, Pa....!"

Igo lang nga nagyangoyango si Ramon nga mitutok sa anak nga nag-andam nag plato sa gamay'ng lamesa aron sudlan sa pansit ug kan-ong humay.

Naandan nilang Ramon ug Jorge nga matag kalagkalag, moduaw gayud sila sa probinsiya ug adto istar sa balay sa iyang magulang babaye uban sa bana ug mga anak niini nga mag-andam og lamiang mga pagkaon-karneng baboy, kandeng, manok ug nagkadaiyang hinog nga mga saging, bibingka, budbod, biko, puto-maya ug pinyato. Inig petsa-dos, adto usab sila managkot sa sementeryo sa ilang baryo, diin atua ang lubnganan sa mitaliwan na nga mga ginikanan ni Ramon.

"Malingaw gyud kong mangalagkalag sa bukid, Pa, kay mora’g pista!"

"Sagdi lang, Dong Jorge! Bisan wa ta kaadto sa probinsiya ning kalagkalaga, i-treat lang tikas Jolibee karong udto, sa dili pa ta managkot og kandela sa dakong krus sa Carreta...!"

"Wow! May kwarta diay ka, Pa...?"

"May gamay kong tinipigan, Dong Jorge! Bisan pamasura lang ang akong panginabuhian, apan may tinigom kong kuwarta, Dong Jorge, pinaagi sa ATM card sa bako ug pwede ko nga maka-withdraw bisan unsang orasa! Nagtigom ko, alang sa pagpadayon mog eskuyla sa hayskol, damlag!"

"Sige na, Pa! Mamahaw una ta ning dala kong pansit ug kan-ong humay...!"

Bisan gihilantan, malipayong nakigsalo si Ramon sa pamahaw sa buotan niyang anak nga gibiyaan sa way nadang inahan niini, usa ka tuig human ihimugso si Jorge ug nakigtaban og laing lalake.

"Dong Jorge! Mangalagkalag tas Jolibee karong udto...!" ug malipayong nangatawa sila si Ramon ug Jorge atol ning kasaulogan sa Adlaw Sa Kalagkalag. Kabos man ang amahan ug anak, apan malipayon sila sa ilang kahimtang. (Kataposan)

ADLAW SA KALAGKALAG

BANAT NEWS

BISAN

DONG JORGE

JOLIBEE

JORGE

MANGALAGKALAG

RAMON

SAN REMEGIO

  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with