Amahan mi abandonar sa iyang anak ug asawa

Ang asawa ug mga anak adunay katungod nga mangayo og suporta sa bana ug sa amahan sa iyang mga anak. Apan unsay buhaton kun ang bana o amahan wa magpakabana sa maong responsibilidad? Asa modangop ang asawa ug mga anak? Kana nga pangutana ang atong tubagon karon.

Dear Atty. Divine,

Aduna koy anak nga mag four (4) years old na apan gibiyaan mi sa iyang amahan tulo ka tuig na ang nakalabay. Nagtrabaho sa abroad ang akong bana apan wa na kini mouli sa among gipuy-an ug wa na gani mo-communicate kanamo og iya mi nga gi-abandonar ug wa  siya magsuporta sa iyang anak. Gusto ko nga mo-file og action for support batok  sa akong bana apan wa na ko masayud kun asa na siya magpuyo karon kun mouli siya sa Pilipinas. Unsa may maayo nako nga buhaton aron siya ma-obligar sa pagsuporta sa among anak? Hinaut nga imo kong matambagan sa akong problema.— Cherrie”

Dear Cherrie,

Ubos sa atong balaod, ang imong bana obligado gyud nga mohatag og suporta kanimo ug sa imong anak. Kana maoy nalatid sa Article 195 sa atong Family Code. Aron ma-obligar siya sa pagsuporta kaninyo mas maayo nga imo gyud siyang pasakaan  og Petition for Support sa Korte. Imong pangayuon sa Korte nga manduan ang imong bana sa pagsuporta kaninyo matag buwan basi sa inyong gikinahanglan nga naglakip sa pagkaon, pinuy-anan, education, medical attendance, transportation ug uban pa kay mao man kana ang basihanan sa amount o kantidad nga angayan ninyong pangayuon matag buwan. Kinahanglan imo sab nga iprobar sa Korte nga ang imong bana  adunay financial capacity sa pagsuporta kaninyo. Apan aron dili malangay ang pagsibog sa kaso, mas maayo nga  imo gyung mahibaw-an ang insakto nga address sa imong bana dinhi sa Pilipinas kay gikinahanglan man gud siya isip Respondent nga motubag sa imong ipasaka nga action for Support ug kinahanglan sab siyang mahatagan og kopya sa tanang mga notices ug pleadings sa Korte. Ang maayo nimong buhaton karon, mao ang pagpangita sa posibleng address sa imong bana pinaagi sa imong mga in-laws, aron kun imong mahibaw-an nga miuli na siya, mahatagan siya sa kopya sa kaso ug iya sab kining matubag. Hinaut nga akong natubag ang imong pangutana. Daghang salamat ug God bless.— Atty. Divine

Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana matag adlaw’ng Miyerkules ug Domingo pinaagi sa atong column.