PNP inaantay 'village health pass' guidelines para sa mga unvaxxed na pasahero
MANILA, Philippines — Hinihintay na lang ng Philippine National Police (PNP) ang detalyadong mga panuntunan sa paggamit ng "village health passes," bagay na kailangang gamitin ng mga hindi pa bakunado laban sa COVID-19 kung sasakay sa pampublikong transportasyon.
Nagpapatupad ang Department of Transportation (DOTr) na "no bakuna, no sakay" policy para sa Metro Manila habang nasa Alert Level 3 pataas ito, maliban na lang sa mga kailangang bumili ng gamot, pagkain, mga kailangang kumuha ng serbisyong medikal, nagtratrabaho atbp.
Exempted din sa DOTr order ang mga may kondisyong pangkalusugang magbabawal sa taong mabakunahan, basta't may pirmadong medical certificate ng doktor.
"This is an effective system in determining if going outdoor is backed by justifiable cause particularly to buy essential goods or avail of essential services," paliwanag ni PNP chief Police General Dionardo Carlos, Huwebes.
Paniwala ni Carlos, malaki ang maitutulong ng klarong instruction para ipatupad ang utos habang nakaiiwas sa kalituhan at pag-angal ng mga apektadong residente.
Una nang sinabi ni DOTr Assistant Secretary for Road Transport and Infrastructure Mark Steven Pastor na magtatalaga ang kagawaran ng mga "mystery passengers" para matiyak na nasusunod ang naturang utos, gaya na lang ng pagpapakita ng vaccine card sa mga driver at operator.
"We have received reports about the proliferation of fake vaccination cards since the launch of the ‘no vaccination, no ride’ policy of the [DOTr]," dagdag pa ni Carlos kanina.
"Now, the possibility of producing fake health passes is never remote, so we need to be specific with the inspection and verification process."
Ipinatupad ang nasabing utos kaugnay pa rin ng biglaang pagtaas ng COVID-19 cases sa Pilipinas nitong mga nagdaang linggo, kasabay na rin ng pagkalat ng mas nakahahawang Omicron variant.
Matatandaang nagpatupad din ng kahalintulad na "no bakuna, no labas" policy ang gobyerno, na siyang sinimulan din sa Metro Manila.
Umabot na sa 3.32 milyon ang nahahawaan ng COVID-19 sa Pilipinas, ayon sa huling taya ng Department of Health ngayong araw. Sa bilang na 'yan, patay na ang 53,153 katao.
- Latest
