Cebu City nag-apas mahuman ang backlog niini sa pagpamakuna
CEBU, Philippines — Gikan sa Disyembre 21 sa miaging tuig hantod niadtong adlaw’ng Miyerkules, Enero 12, 2022 miabot na sa 131,000 ang nabakunahan sa Cebu City, kasagaran niini second dose sigon pa ni Dr. Jeffrey Ibones, Officer-in-Charge sa Cebu City Health Department.
Giklaro sab ni Ibones nga ang mga vaccination sites sa Cebu City modawat og mga residente sa siyudad bisan paman og sa laing lugar sila nagpabakuna sa ilahang first ug second dose sa COVID-19 vaccine.
Kun mahuman na sa Cebu City Health Department ang backlog sunod semana si Dr. Ibones miasoy nga posible modawat na sila og mga indibidwal nga dili taga siyudad nga buot dinhi magpabakuna.
“Gihinay-hinay lang sa ni nato kay ma overwhelmed man gud ta, naa man gud tay backlog nga mga 70 plus thousand nga atoa pang bakunahan sa atoang dakbayan maong naningkamot gyud ang siyudad sa Sugbo nga makabakuna gyud og daghan,” pasabot ni Ibones.
Kagahapon ang Cebu City dunay 21 ka mga vaccination sites nga modawat og first ug second dose ingon man booster shot sa COVID-19 vaccines.
“Actually mas maayo gyud unta magpa-register but because of the kaning problema nato sa internet, naay mga areas, naay mga individuals nga maglisod sila og sulod moadto lang gyud sila sa atoang vaccination site, nidawat ra gyud ta og walk-in but kung naay opportunity gyud nga pwede ta maka-log in, maka register sa atong site mas maayo gyud para madali sila,”sigon ni Ibones.
Samtang nanawagan si Ibones sa katawhan nga karong alert level 3 naman ang Cebu City sundon gyud pirme ang basic health protocols sama sa saktong pagsul-ob sa face mask ug kining social distancing aron malikayan ang tinakdanay sa COVID-19.
Hangyo niya sa katawhan nga bisan og nabakunahan na kontra COVID-19 dili gihapon mokompiyansa.— IBM (BANATNEWS)
- Latest
