Ang mga kanding
Bisan unsa na lang ang moabot sa akong hunahuna ning panahon sa pandemiya.
Mao nga plano nako ang pagbuhi og kanding aron duna koy kalingawan og tan-aw tan-aw ingon man tugwaytugway ning panahon sa dakong kalisdanan. Kini maoy nakapadasig nako sa pagbasa og dugang pang katitikan kalabot ning maong mananap.
Sa laktod nga pagkasulti, nahimo akong seryoso ning maong kawsa wa pay labot sa pagpanindot sa nataran sa parokya pinaagi sa pagpatanum og mga kahoy ingon mga utanon nga sarang magamit inig abot sa panahon diin malisod na gyud ang pagkaon. Hinuon dili kini alang kanako lamang kondili usab sa mga parokyano nga nagkinahanglan.
Lisud ning dili kita mamahimong self-sufficient ning panahon sa dakong panginahanglan.
Ning maong kasinatian akong naalinggatan ning mosunod:
1. Akong nakita ang dakong bili sa paggamit sa bisan unsa nga anaa. Ayaw pangita sa wala diha.
2. Ang pagka mamugnaon panahon ning dakong kalisdanan.
3. ROI kon Return of Intention. Dili lang Return of Investment. Unsa man gyud ang hustong katuyoan sa paghimo og bisan unsa.
Kun husto ang imong intensiyon nan, mamahimong husto pud ang imong paningkamot ug pakigbisog kay ang pakigbisog nga sibo lang sa mas personal nga paglambo dili pud kaayo makatabang ug makiangayon.
4. Ang pagpailob mahimong usa ka birtud labina kun diha sa pag-atiman og hayopan imo kining pagahimoon. Kay kun wa kay pailob malisud alang nimo ang pagpakigharong sa mga hayop.
Mahimong mosugo ka og tawo nga maoy moatiman kanila apan mas lahi man gud kun anaa ang personal touch sa imong gipanghimo di ba makahuloganon kini nga anaa kay personal imprint sa imong panlimbasog?
5. Ug ang matag paningkamot dunay makab-ot nga ani, panalangin nga imong makuha diha sa paningkamot ug walay puas nga pag-ampo.
Bisan pa man sa mga hitabo karon pasalamat gihapon ako sa Ginoo kay wala siya motalikod.
At least nahatagan ko og kahigayonan nga motampo sa panginahanglan sa uban. Unta ang mga kanding magtudlo kanako sa dalan sa pagkamapailubon samtang itugway ko sila adlaw-adlaw.
- Latest
