23 naayo sa COVID-19, 17 ang bag-o sa Lapu-Lapu

CEBU, Philippines — Gihangop ni Lapu-Lapu City Mayor Junard “Ahong” Chan pagkaayo sa 23 ka tawo nga bag-ong naayo gikan sa sakit nga COVID-19.

Apan bisan pa man sa maong kalambuan, gibati gihapon niya ang kabalaka tungod kay nagpadayon gihapon ang pagsaka sa gidaghanon sa mga natala nga gitakbuyan sa maong sakit.

Naglakip kini sa 71 ka bag-ong kaso kinsa ang 17 niini mga frontliners nga gilangkuban sa mga nurse ug doctor sa Lapu-Lapu City Hospital.

Matud ni Chan nga nalakip usab sa natala nga bag-ong pasyente sa COVID-19 ang sakop sa kapolisan nga gitahasan sa pagbantay sa control checkpoint sa dakbayan.  Nunot niini ang mga personnel sa City Disaster Risk Reduction and Management Office (CDRRMO) ang nagpahigayon na og contact tracing sa close contact sa 71 ka tawo.

Gihimo sab ang disinfection sa mga dapit sama sa Barangay Babag, Bankal, Basak, Babag, Calawisan, Canjulao, Gun-ob, Ibo, Looc, Mactan, Marigondon, Pajac, Pajo, Pusok, Sabang, Suba Basbas, Tungasan ug Mactan Airbase.

Samtang dakung hagit nga giatubang karon sa kagamhanan sa dakbayan ang pagpalambo sa serbisyo sa panglawas taliwala sa krisis sa coronavirus disease 2019.

Kini ang gipahayag ni Chan atol sa iyang labing una nga State of the City Address (SOCA) sa niaging adlaw atubangan sa konseho sa dakbayan.

Naglakip sa iyang gitumbok nga iyang napalambo mao ang pagserbisyo sa panglawas sa mga Oponganon pinaagi sa iyang pagkuha og dugang medical personnel, pagpalapad ug pagpalambo sa laboratory ug medical services sa tambalanan sa mainland ug apil na ang sa Isla sa Olango.

Dugang nahimo sa iyang usa ka tuig nga pagserbisyo isip mayor sa dakbayan mao ang hugot nga kampanya sa pagsumpo sa ilegal nga drugas, pagpausbaw sa financial assistance sa mga senior citizens, mga proyektong pang-imprastraktura ug ang iyang pagpabalik sa pagsalmot sa Sinulog Festival niadtong Enero 2020 ug uban pa.

“Dealing with the gargantuan challenge which is COVID-19 during my first year as mayor is truly a heartache… (but) I would like to thank sincerely my City Hall workers and department heads for the quick response,” matud ni Chan. /GMR (BANATNEWS)