COVID-19 update: Mga bag-ong kaso sa COVID-19 sa Sugbo

CEBU, Philippines — Mga nangaayo sa sakit nga COVID-19 sa dakbayan nagkadaghan, samtang padayon sab gihapon ang pagkatala sa dugang mga kaso niini base sa natala sa Cebu City Health Department.

Gipahibawo ni Atty. Rey Gealon, tigpamaba ni Cebu City Mayor Edgardo Labella nga kagahapong adlawa nadugangan og 16 ka pasyente ang talaan sa mga naka-recover sa Corona Virus Disease(COVID)-2019 sa siyudad.

Base sa talaan sa CCHD ang 16 ka mga naayo sa COVID gikan sa Barangay Carreta , Labangon, Ermita, Camputhaw, Pasil, Lahug ug Mambaling.

Moabot na sa 1,176 ang total recoveries sa Cebu City samtang ang active COVID-19 cases sa siyudad naa sa 1,246.

Samtang 42 ka mga bag-ong COVID-19 cases ang natala:  tagsa ka kaso sa Banawa, Luz, Guadalupe,  Bulacao, Calamba, Camputhaw , Carreta, Lahug,Lorega, San Nicolas Proper, Suba, Pardo ug Tisa.

Samtang  duha sa Barangay Basak San Nicolas,  unom sa Duljo Fatima, duha sa Ermita, duha sa Inayawan, upat sa Labangon, duha sa Quiot, tulo sa Sambag 1,  duha sa Sawang Calero, upat sa Tejero ug  duha sa Tinago.

Samtang sa Probinsya sa Sugbo, dugang 13 ka positive cases sa virus ang natala kagahapong adlawa  sumala pa ni Cebu Governor Gwendolyn Garcia sa iyang virtual presser kagahapon.

Gikan kini sa 202 ka swabs nga nigawas ang resulta kagahapong kon diin 21 ang positibo apan ang walo (8) niini repeat test na.

Sa mga bag-ong positibo nga kaso, si Garcia nagkanayon nga unom (6) niini sa Minglanilla nga pulos asymptomatic. Lima (5) sa Talisay City diin tulo (3) ang walay sintomas; usa ka health worker sa Barili ug usa sa lungsod sa Consolacion.

Sa pagkakaron ang running total sa Probinsya sa Sugbo niabot na sa 186.

Sumala sa gobernador sa pagkakaron moabot na sa 3,111 ang running total sa COVID-19 cases lukop isla sa Sugbo. Le Phyllis F. Antojado /IBM (BANATNEWS)