Magnolia sinikwat ang bonus

MANILA, Philippines — Ayaw nang pumasok ng mga Hotshots sa komplikasyon para sa ikalawang ‘twice-to-beat’ incentive sa eight-team quarterfinal round.

Tuluyan nang sinibak ng Magnolia ang Meralco sa pamamagitan ng 90-80 panalo para angkinin ang nasabing bonus sa 2018 PBA Philippine Cup kahapon sa Xavier University Gym sa Ca­ga­yan De Oro City.

Winakasan ng Hotshots ang kanilang apat na sunod na kamalasan sa mga out-of-town games para singilin ang pang-walong panalo sa 11 asignatura.

Natapos naman ang sinakyang two-game winning streak ng Bolts pati na ang kanilang tsansang makasama sa quarterfinals.

Umeksena si combo guard Paul Lee mula sa kanyang 23 points tampok ang 12-of-17 fieldgoal shooting para banderahan ang tropa ni coach Chito Victolero, nakahugot ng 12 markers kay Ian Sangalang.

Mula sa 22-22 pagkakatabla ay umarangkada ang Hotshots para itakbo ang 12-point lead, 44-32, sa halftime patungo sa pagpoposte ng 21-point advantage, 66-45, laban sa Bolts galing sa banked shot ni Bambam Gamalinda sa huling 1:43 minuto ng third period.

MAGNOLIA 94 - Lee 21, Sangalang 12, Herndon 10, Melton 8, Simon 8, Barroca 7, Mendoza 5, Reavis 4, Pingris 4, Gamalinda 4, Brondial 4, Pascual 4, Dela Rosa 3.

Meralco 65 - Newsome 13, Sedurifa 10, Lanete 9, Caram 8, Ballesteros 6, Amer 5, Salva 4, Canaleta 4, Faundo 4, Hugnatan 2, Dillinger 0, Bono 0, Tolomia 0, Baracael 0.

Quarterscores: 20-15; 44-32; 68-48; 94-65.