Araña puwede nang maging coach?

Coach Ryan Araña?

MANILA, Philippines — Posibleng iyan na ang maging bansag kay Araña kapag natapos na ang kanyang karera sa pag-lalaro makaraang magpamalas ng angking galing sa pagiging coach kahit sa sandaling pagkakataon lamang.

Sa huling 1:37 minuto ng laban kung kailan lamang ang Globalport kontra sa Kia kamakalawa, sopresang ibinigay ni Coach Pido Jarencio ang playboard sa kanyang beteranong manlalarong si Araña.

Bagama’t nabigla ay sumunod sa utos si Araña.

“Habang naghu-huddle sila, umupo lang ako then binigay sa akin yung board. ‘Sige, Ryan, ikaw mag-drawing ng last play for Stanley Pringle’. So nag-drawing ako and everyone was listening,” paglalahad ni Araña.

Bilang sukli, hindi binigo ni Araña dahil tagumpay ang tinatawag nilang ‘Y’ play na nagresulta sa basket ni Pringle.

Ikinatuwa ito ni Ja-rencio at sinabing produkto lang aniya ito ng solido nilang samahan sa Batang Pier kung saan ang lahat ay makikinig sa kanya man bilang coach o sa mga beteranong manla-laro bilang kanilang lider.

Wagi ang Globalport sa labang iyon, 108-91 upang umangat sa 5-5 kartada at mapalakas lalo ang tsansang makapasok sa playoffs ng umaatikabong 2018 Philippine Basketball Association (PBA) Philippine Cup.

Nagkasya lamang si Araña sa dalawang puntos, walong rebounds at dalawang assists ngunit higit sa mga numero ay mas mahalaga ang karanasang nakuha niya na posibleng maging alas niya sa kanyang coaching career sa hinaharap. (ADimasalang)