Four-peat sa Magis Eagles
CEBU, Philippines - Ang Sacred Heart School-Ateneo de Cebu Magis Eagles mikumpleto og two-game sweep batok sa University of Cebu Junior Webmasters human kini nila gilabhan og usab, 72-56, sa Game 2 sa ilang best-of-three finals aron pagsakmit og makasaysayanong four-peat sa Cebu Schools Athletic Foundation, Inc. basketball kagahapon didto sa Cebu Coliseum.
Mao kadto ang ikaupat nga sunod-sunod nga korona sa Magis Eagles sukad niadtong 2012.
Nahug sab kini nga tam-is nga panimalos sa Magis Eagles batok sa Junior Webmasters, ang bugtong team nga nakapilde kanila dili lamang kausa apan kaduha karong season.
"Every championship is always special for us. We've proven once again that our efforts, hard work and sacrifice are all worth it. And I give all credit to my boys," matud pa ni Magis Eagles coach Rommel Rasmo.
Sila si Emilio Nacua ug Eroll Pastor mitali og 14 puntos matag usa samtang si Christian Manaytay midugang og usa ka dosenang puntos sa Magis Eagles. Si Jed Colonia mitapos lamang og nuybe puntos apan ang nindot niyang salida maoy naghatag sa ikaduha niyang sunod-sunod nga MVP award.
Si Colonia giduyogan sa Mythical Five nilang Pastor, Gelmart Umpad sa Junior Webmasters, Jancork Cabahug sa University of the Visayas Baby Lancers ug James Tempra sa Cebu Eastern College Dragons.
Klaro kaayo ang tuyo sa Magis Eagles nga tapuson dayon ang serye human ilang giablihan ang duwa pinaagi sa 15-0 run dayon na ngadto sa pagposte og 21-4 nga labaw human sa unang kuwarter. Niadtong higayona wala maka-iskor ang UC sud sa nag-unang otso minutos sa duwa.
Igo lamang mipaduol ang UC sa iskor nga 12-21 gumikan kay ang Magis Eagles mi-arangkada sab dayon aron pag-inat og balik sa ilang labaw, 37-16, atol sa halftime.
Sukad niadto, kontrolado na kaayo sa Magis Eagles ang duwa ug ila pa gani nga gipaburot ngadto sa 22 puntos, 61-39, nga nakabugha sa Junior Webmasters sa nahibiling sayes minutos. EBV (BANAT NEWS)
- Latest
