Pacquiao-Matthysse eksplosibong away
CEBU, Philippines — Gihulagway sa beteranong Las Vegas matchmaker nga si Sean Gibbons nga si WBA welterweight champion Lucas Matthysse sa Argentina usa ka lig-on ug peligrong kontra, apan kon si Manny Pacquiao anaa sa maayong kondisyon, ang Pinoy ring star maoy modaog sa giplano nilang away karong Hunyo 24 didto sa Kuala Lumpur, Malaysia.
Sigun sa taho ni Joaquin Henson sa Philboxing.com, si Gibbons makadalit og eksplosibong away ni Pacquiao gumikan andam kini nga makighilam-osay og kumo sa iyang kontra ug dili sama ni Jeff Horn nga molabay og hugaw nga taktika.
Nabasa hinoon ni Gibbons nga si Matthysse maglisud og santa sa kapaspas ug kaabtik ni Pacquiao kon ugaling madayon ang ilang karambola ibabaw sa ring.
“Matthysse will find it difficult to handle Manny’s quickness,” matud pa ni Gibbons sa maong taho ni Henson .
Midugang si Gibbons nga kon si Pacquiao anaa lang sa ensaktong kondisyon, dili mahitabo nga si Matthysse modaog batok sa bugtong eight-division world champion sa kasaysayan.
Sa panahom ni Gibbons, bugtong dag-anan ni Matthysse mao nga kon aksidente kining makalandig og solidong kumo sama sa gihimong pagpalukapa ni Juan Manuel Marquez ni Pacquiao sa ikaupat nilang away niadtong tuig 2012 didto sa Las Vegas. (BANAT NEWS)
- Latest
