Max Bond, Flexicrete  mag-abot sa kampiyonato

CEBU, Philippines —  Ang Sugbu Max Bond nagsandig sa mainit nga mga kamot nilang Criz Matunog ug Dexel Caadan aron tagakon ang Cebu Sinclair Paint, 86-77, ug mo-abante sa kampiyonato sa Cebu Architects Basketball Club (CABC) Buildrite Cup 2023 niadtong weekend didto sa Benedicto College gymnasium sa may dalan A.S. Fortuna, dakbayan sa Mandaue.

Si Matunog mipasud og pito sa 13 niya ka 3-pointers aron pagkadlit og 23 puntos nga iyang gipalamanan og duha ka rebounds, tulo ka assists ug duha ka steals.  Impresibo sab kaayo si Caadan nga way sipyat sa pito niya ka itsa ingon man tulo ka free throws dayon na ngadto sa pagtali og 17 puntos uban ang tulo ka rebounds ug duha ka blocks alang sa Max Bond, nga wala na molingi pa sukad miposte og 73-63 nga labaw sa tunga-tungang bahin sa katapusang kuwarter.

Mihimo sab og kasikas si Chester Hinagdaan uban ang 15 puntos, upat ka rebounds, lima ka assists, tulo ka steals ug usa ka block alang sa Max Bond.

Wala sab magpa-alkansi sila si team captain Chad Go ug Michael Judilla nga parehong mi-iskor og 10 puntos ug nagkumbinar og 10 ka rebounds, lima ka ka assists ug duha ka teals alang sa Max Bond, nga makigharong sunod batok sa Metro Cebu Flexicrete, nga miangkon sa laing luna sa final human giplagpot ang Datu Lapu-Lapu Sapal, 86-79.

Si Michael Cinco maoy nangu sa Flexicrete uban ang solidong double-double nga 26 puntos ug 11 ka rebounds uban ang upat ka assists, duha ka steals ug usa ka block. Nakakuha siya og dakong suporta gikan nilang Jason Cinco ug Ferdinand Tiro nga nagkumboya'g 30 puntos.

 Ang Max Bond ug Flexicrete gikatakda nga mag-ilog sa korona sa tinagakay nga duwa karong Domingo, Marso 26, sa susamang binyu.