Misyon ni James hapit na makab-ot

CEBU, Philippines — Sa iyang pagtikang sa Los Angeles duha ka tuig na ang milabay, si LeBron James misaad nga iyang banhawon ang bulawanong mga panahon sa Lakers sa NBA.

Napalaw man tuod siya sa una niyang season sa Hollywood diin siya nakapalta og 27 ka duwa gumikan sa injury ug ang Lakers wala makasud sa playoffs nga nahitabo sa ikatulo pa lamang nga higayon sa iyang karera, si James namawi ning season.

Ubos sa pagpangu ni James, ang Lakers nakampiyon sa Western Conference ug miabante sa NBA Finals sa labing unang higayon sukad niadtong 2010.

Matud pa ni James nga wala siya makalimot sa iyang panumpa. Tuyo ug tumong gyud niya ang paghalad og korona sa Lakers nga maoy nag-unang rason nganong mibakwit siya gikan sa yuta niyang natawhan nga Cleveland aron mangindahay sa LA.

Sa wala pa maabot si James sa LA niadtong 2018, nagkagidlay ang Lakers ug wala na makasud pa sa NBA Finals sud sa usa ka dekada.

Karon nga anaa si James, misidlak ang Lakers ug nakuha og balik ang respeto sa ilang mga karibal. Sa habig ni James, usa na lang ka babag ang kinahanglan niyang latason aron matuman iyang gisaad sa Lakers ug makab-ot ang iyang misyon.