‘Of Flashbacks And Wash-Baths’

“Habang lumalakad ang bawat panahon,

Waring kinakaba’t panay na ang lingon,”

Mga unang titik ng sinulat noon,

Mahigit apatnapung taon na ngayon!

For VST inyo bang natatandaan?

At Ang Poet N’yo ‘yan pa ay dinugtungan,

“Sa pagpalit-palit ng mga araw,

Naiinggit na tayo sa nakaraan...”

The song: “Mabuti Pa Nung Bata Masaya,”

Mayabang este, abang ako nagletra!

Tito pa yata UMANO ng musika,

May masama ba? WALA! ‘Di ba ang ganda?!

Sa seryong usapan akin lang napuna —

Katas ng sinabi’y totoo nga pala!

Sa hinaharap may hiblang pagdududa,

Mas palagay ka sa mga alaala!

Hindi ba madalas ang balon ng saya,

At walang mintis barkada ay tatawa,

Kapag kabataan ay inaalala;

Mga gamit at gawi pa’y sinauna!

Kaya nga pati ngayon sa social media,

Sa buong linggo may pagpapahalaga,

Sa mga THROWBACK n’yo na pinapakita,

Kung minsa’y nakaka-THROW UP na ‘yung iba!

Ngek! Op kors kaiba pa nun ating hitsura!

Naturalmente lalo nung uso sepia!

Sa lumang larawan iba ating porma,

Kahit nakapormal ay wacky talaga!

Ngunit kahit asiwa noon pigura,

Sa totoo’y kaiba rin ating ligaya

Sa mga larawang ligtas at buhay pa

Kahit wala nang buhay ibang kasama!

Awww… ayan na ‘yung sinasabi na nga ba,

Bayaan na natin silang magpahinga,

Teka nga bakit ba tawag “magpahinga”?

‘Di ba wala na silang mga hininga?!

Ngek ulit! C’mon let’s make lingon-lingon na!

Hellowww… syempre ‘yung old telephone na muna

Ating pag-usapan ‘yung black and heavy ba,

‘Di ba ang tawag din dun DEADLY WEAPON s’ya!

But wait, ‘di lang pampamilya, pang-tsismis pa!

Dahil sa party line pag nakikinig ka!

Subalit may kabutihan lang s’yang ISA —

Sa snatching hindi ka mabibiktima!

Pampabango sa mouthpiece ay nauso pa!

Pa’no naman lahat ng klaseng hininga

Naiiwan dun lalo’t nagpapabayad ka!

Okay lang sana ‘yun but sometimes… MAY TINGA!

Pwe! Pwero today ang phone na’y kanya-kanya

At ‘yung kausap mo pa ay nakikita!

Black heavy phone is a TINGA of the past na!

O ano, hindi ba kayo natatawa?!

Cologne ng lalaki ngayo’y sangkaterba!

Kumpleto letra from Armani to Zegna!

Subalit bago pa man Jovan at Brut pa,

Kuntento na sa berdeng nasa barberya!

May dinaanan pa ngang mas malupit pa —

Tawagin nating s’yang TUNABINAGUITA!

Hmmm... medyo lumelebel sa Aqua Velva?

Tubig Na Binabaran Ng Sampaguita!

‘Di “imbento” ‘yat IMBENTO ko talaga!

Pag pinapaliguan ako ni yaya,

Isinasabay sa kanyang paglalaba

Kaya amoy ko nung bata AMOY PERLA!

That’s why… mabuti pa nung bata… MAY YAYA!

LAB n’ya ‘ko kahit ginagawang labada!

Si Little Joey nun mestizo talaga!

Eh paano naman laging KINUKULA!

Parang nun s’ya ang goddess kong si Diana!

Kumbaga Wonder Woman my DI-YAYA-NA!

Nung nalunod ako niligtas pa niya!

Pero LAUNDER WOMAN mas bagay sa kanya!