Nagka-gf dahil joker

Dear Dr. Love,

Tawagin na lamang, Joker. May mga babae akong napapasagot dahil sa pagiging joker ko. Nakatatlong gf ako, na nag-enjoy naman sa relationship namin. ‘Yung lang, may mga dahilan kung kaya nagkakahiwalay kami.

‘Yung una, umuwi na ng probinsiya. Ang isa naman, nag-abroad na. Ang huli, kong gf pinagbawalan ng tatay na makipagkita sa akin.

Hindi ko naman masasabi na failure ako sa relationship. Dahil wala naman silang naging problema sa akin. Sa katunayan nga, mga kaibigan ko sila hanggang ngayon.

Nakakalungkot lang na sa kabila ng pagiging masayahin ko ay wala akong gf ngayon.

May napupusuan ako kaso, nagdadalawang-isip ako kung seseryosohin ko ang dating sa kanya o gaya na ng dati, na maging joker ko.

Napaka-simpleng babae niya. Hindi ko alam kung papatok na patawanin ko siya sa mga jokes ko. Kasi may nabanggit siyang mga bolero lang daw ang mga patawa. Minsan sinungaling pa raw at dinadaan lang sa jokes ang lahat para matago ang tunay na nararamdaman.

Gusto-gusto ko pa naman ang pagiging simple niya. Hindi naman ako na-offend sa sinabi niya, dahil tama naman lahat iyon.

Joker

Dear Joker,

Kung pangalan mo talaga ay Joker,  mag-iba ka ng itatawag sa iyo, kung seseryosohin mo siya. Joke lang! Ang maipapayo ko, just be yourself. Huwag mong pilitin na maging seryoso kung hindi ka naman talaga ganoon.

Kahit corny, ok lang. Mas mahirap ang magpanggap na hindi mo naman nakasanayan.

Patunayan mo sa kanya na mali ang sinasabi niya. Mas mainam magdala ng problema ang mga taong tulad mo, kaysa sa mga laging nakasimangot.

Be happy at stay nice as you are. Mas simple, mas maganda.

Dr. Love