May ibang ‘kabit’ ang ka-live in
Dear Dr. Love,
Sana’y mapagpayuhan mo ako sa mabigat na problemang pinapasan ko. Tawagin mo na lang akong Wilbur, 23 anyos at may live-in partner.
Isang taon na kaming nagsasama sa isang bubong ni Brenda. Mahal ko siya at toda sustento ako sa lahat ng kanyang hilig.
Malaki ang kinikita ko bilang isang attendant sa casino kaya naibibigay ko lahat ang gusto niya. Nakatira kami sa isang disenteng apartment.
Pero may nakapagbulong sa akin na may ibang kabit si Brenda, bagay na hindi ko pinaniwalaan hanggang sa nabasa ko sa text message niya sa cellphone ang ganito: “Love, pinadalhan kita ng ten thou sa Cebuana.”
Inaway ko siya sa natuklasan ko hanggang mapaamin ko siya. Humingi siya ng tawad at nakiusap na huwag ko siyang palayasin. Makikipag-break na raw siya sa kanyang lalaki.
Tama ba na bigyan ko pa siya ng isang chance?
Wilbur
Dear Wilbur,
Huwag kang magpabulag sa laki ng pag-ibig mo sa iyong ka-live-in. Nagpapakahirap kang magtrabaho tapos ang kinikita mo, ibang lalaki ang nagpapasasa?
Kalimutan mo na siya at humanap ng disenteng babae na hindi mo lang magiging live-in partner kundi isang asawang pakakasalan sa harap ng Diyos.
Kung ang malaking kinikita mo ay iimpukin at sisinupin mo, magandang kinabukasan ang nakalaan sa iyo at sa iyong magiging pamilya.
Dr. Love
- Latest