Bading si Papa
Dear Dr. Love,
Nagseselos ang girlfriend ko sa tatay niya. Dati kasing bading ‘yun. Nung mabuking ng mama niya ay naghiwalay na sila.
Malapit ang loob ng tatay niya sa akin dahil sa magandang pakikitungo ko sa pamilya nila. Kaso ayaw ng girlfriend kong lalapit ako at makikipag-usap sa papa niya.
Nung birthday ng papa niya, nakipag-inuman ako at nalasing. Hindi na ako nakauwi ng bahay, ang papa niya ang nag-asikaso sa akin. Lasing din ang gf ko, kaya akala niya ay may ginawang hindi maganda sa’kin ang papa niya. Simula noon ayaw na niya akong makikipag-usap at papuntahin sa bahay nila.
Nahihiya ako dahil mabait ang papa niya sa akin tapos parang wala pa kaming tiwala sa kanya. Ayaw ko namang magkahiwalay kami dahil sa selos na hindi naman dapat.
Arvin
Dear Arvin,
Tama lang na sabihan mo ang gf mo na huwag pag-isipan ng masama ang tatay niya. Kahit naman siguro bading noon ay hindi ka papatulan ng tatay niya. Ang isang tatay ay dapat nating galangin kahit ano pa man ang kanyang pagkatao. Ikaw naman ang makasasagot kung ano talaga ang nangyari noong oras na iyon.
Please lang ha, paano magiging maayos ang relasyon ninyo kung wala ang tiwala. Ito ang sabihin mo sa iyong gf.
Dr. Love
- Latest