UST kinumpleto ang semis
MANILA, Philippines — Mabilis na naapula ng UST ang mainit na resbak ng Adamson upang kubrahin ang 25-20, 25-23, 19-25, 23-25, 15-11 panalo para angkinin ang huling silya sa Final Four ng UAAP Season 80 men’s volleyball tournament kahapon sa The Arena sa San Juan City.
Inilabas ni Joshua Umandal ang matatalim na pangil nito matapos magpako ng 21 puntos para dalhin ang Growling Tigers sa semifinals.
Umariba rin si Arnold Bautista na bumanat ng 17 puntos at 13 digs gayundin sina Tyrone Carodan na may 13 puntos, Manuel Medina na may 10 puntos at Jayvee Sumagaysay na nagtala ng apat na hits, tatlong blocks at dalawang aces.
Pukpukan ang laban na pumabor lamang ng bahagya sa Growling Tigers --57-55 sa attack line, 11-10 sa blocking department at 8-5 sa service area.
Nakakuha pa ng 34 unforced errors ang UST kumpara sa 31 lamang ng Adamson.
Makakalaban ng UST ang top seed National University sa Final Four habang magtitipan naman sa hiwalay na semis game ang nagdedepensang Ateneo at No. 2 at twice-to-beat holder FEU. (CCo)
- Latest