Ginang gipatay, kapuyo naghikog

CEBU, Philippines - Patay ang usa ka babaye human gipatay sa iyang kapuyo nga iyaha ra usab bayaw  samtang ang suspek giingong naghikog usab atol sa ilang mainiton nga lalis sa may Valeriano Compound, Upper Labogon, Dakbayan sa Mandaue kagahapon sa buntag.

Ang gipatay mao si Analiza Lacno, 42, minyo, samtang ang suspek nga iyaha rang bayaw nga nahimo niining kapuyo mao si Danilo Lacno, 41.

Matud pa ni Police Officer 1 Ravinzoro Anor, Desk Officer Police Station 3, adunay mitawag kanila bahin sa pagpanunggab nga nahitabo sa maong barangay.

Pag-abot sa kapulisan sa gipuy-an sa duha ilang nakita ang biktima nga wala nay kinabuhi ug nabulit kini sa tinigbasan sa kalawasan, samtang ang suspek naabtan nila nga nagtinga pa ug dali nga gidala sa tambalanan apan gideklarar kining patay na. Matud pa nag-unay kini pagdunggab sa iyang tiyan.

Base sa inisyal nga imbestigasyon, si Analiza kasado sa maguwang sa suspek apan nagkabuwag ang duha ug human niini nanguyab si Danilo nga gisugot usab sa ginang hinungdan nga sila na maoy nagpuyo.

Sa wala pa nahitabo ang krimen, adunay mainiton nga panaglalis nga nahitabo sa duha. Matud pa nga nakadungog ang suspek nga adunay laing karelasyon ang biktima nga niresulta sa maong krimen.(/IBM)(BANAT NEWS)