Wade nag-wilde

CEBU, Philippines - Daw sa gituyok og balik ni Dwyane Wade ang orasan sa eksplosibo niyang duwa nga nahimong hinagiban sa Miami Heat aron putlon ang 17 ka sagunson nga daog sa Philadelphia 76ers ug tablahon ang ilang ‘best-of-seven’ Eastern Conference playoffs  sa NBA.

Ang 36-anyos nga si Wade miiskor og 28 puntos, 21 niini iyang girapido sa first half, sud lamang sa 25 minutos sa dihang gipahilom sa Heat ang bagang panon sa Sixers fans bugti sa 113-103 nilang kadaogan kagahapon didto sa Wells Fargo Center sa Philadelphia, Pennsylvania.

Usa ka makapakurog sa tuhod nga performance ang gipakita ni Wade, usa ka three-time NBA champion nga nagsugod sa iyang season uban sa Cleveland Cavaliers sa wala pa siya gilabay og balik sa Heat.

Si Wade nga dunay pito ka rebounds ug tulo ka assists, gipaluyohan nilang Goran Dragic ug James Johnson nga nagkumboya’g 38 puntos.

“I just came in with an aggressive approach. I told myself that whatever minutes I was going to play, I was going to do it aggressively,” pahayag ni Wade.

Samtang nagmaya ang Heat, ang Sixers nanghinuklog sa labing una nilang pilde sukad niadtong sayong bahin sa Marso. Angayan lamang kini nila buhaton gumikan kay ang Heat man maoy mo-host sa Game 3 karong Biyernes.

Si Ben Simmons maoy nangu sa Philadelphia uban  ang 24 puntos. Si Dario Saric mihipos og 23 puntos ug si Marco Belinelli mitali og 16 puntos sa pilderong koponan.

Didto sa Oakland, California, sila si Kevin Durant ug Klay Thompson mibahog og dili momenos sa 30 puntos matag usa sa dihang gipilde og usab sa Golden State Warriors ang San Antonio Spurs, 116-101, aron pagposte og 2-0 nga bentaha sa ilang serye  sa Western Conference.

Bisan og mas determinado ang Spurs ning higayona ubos sa pagpangu ni LaMarcus Aldridge nga mipabuhagay og 34 puntos, wala gihapon sila kaugpo kay hait kaayo ang dinuwaan nilang Durant ug Thompson.

Igo lamang gipatambok sa Warriors ang Spurs nga misutoy ngadto sa 53-47 nga labaw sa halftime gumikan kay sila na maoy mikupot sa manobela sa opensa sa duwa sa second half.

Si Durant mitapos uban ang 32 puntos, unom ka rebounds ug unom sab ka assists, samtang si Thompson dunay 31 puntos ug lima ka assists.

Katapusan naglabaw ang Spurs sa iskor nga 67-66 sa nahibiling kuwatro minutos sa ikatulong kuwarter gumikan kay si Durant miposa og duha ka sagunson nga tres aron pagpalabaw sa Warriors sa hingpit, 74-67.