Pagbudhi sa SAF
Dakong sagpa sa pamunoan ni Presidente Rodrigo Duterte ang nabisto nga eskandalo sa Special Action Force (SAF) sa Philippine National Police (PNP):
Ang paghikaw sa mga sakop sa SAF sa ilang inadlaw nga Additional Subsistence Allowance (ASA) sa niaging duha ka tuig nga nikabat na og P59.8 milyones.
Ang hepe sa SAF nga nag-atubang na karon sa kasong Plunder tungod sa gipasangil nga eskandalo, natudlo atol sa pamunoang Duterte nga nagpatuo nga dili motugot bisan sa inalisngaw na lang sa pangurakot ug nangangkon nga labihan kamahigugmaon sa mga polis.
* * *
Kusganong gisaway ni Presidente Duterte si kanhi Presidente Noynoy Aquino tungod sa pagdumili paghatag og hingpit nga suporta sa SAF human namatyan og 44 ka sakop sa nabulilyaso nilang Oplan Exodus sa Mamasapano sa Maguindanao niadtong 2015.
Apan samtang kuwestiyonable ang pagpalabi ni Aquino sa inugurasyon sa planta sa sakyanan sa Laguna kay sa pagsugat sa mga patay’ng lawas sa mga sakop sa SAF sa Villamor Airbase, dili siya makatulisok ni Aquino nga nibulsa sa mga benepisyo sa mga sakop sa SAF.
* * *
Lisud ipasabot sa pamunoan nga nagpatuong nasilag sa pangurakot ang ilang pagpakabuta-bungol sa tiyabaw sa mga sakop sa SAF nga wa kadawat sa ilang ASA nga P30 matag adlaw, o P900 matag buwan hangtud nga niabot na og P59.8 milyones sa niaging duha ka tuig.
Napugos pagkiha ang mga sakop sa SAF kay wa’y nahitabo bisan nidangop na sila sa bag-ong hepe sa SAF nga si Heneral Noli Taliño (kanhi hepe sa Police Regional Office sa Central Visayas) ug kanhi hepe sa SAF nga si Heneral Getulio Napeñas.
* * *
Labing laksot nga mga aspeto sa eskandalo:
Gitudlo ni Outgoing PNP Director General Bato dela Rosa ang gireklamohan nga hepe sa SAF nga si Heneral Benjamin Lusad bisan dili siya SAF ug wa matandog sa eskandalo kay giila nga maoy “tigluwas” ni Dela Rosa dihang kadete pa sa Philippine Military Academy (PMA); ug
Gipatuo ni Lusad nga gigamit niya ang ASA alang sa dakong gasto sa gubat sa Marawi City ug sa ubang mahinungdanon nga kalihokan sa SAF apan wa’y napakita nga bisan usa ka dokumento pagmatuod sa iyang mga pangangkon.
- Latest
