Alcoy, Bantayan gisugat og daog sa Gov's Cup
CEBU, Philippines — Ang Alcoy Siloy mipahimus og maayo sa bugnaw kaayong sinugdanan sa Boljoon aron pagkulit og 68-61 nga daog pagsikad sa 2nd Cebu Governor’s Cup Inter-Cities and Municipalites Under-21 Developmental Basketball Tournament niadtong Domingo diha sa Cebu Coliseum.
Sa pasiunang duwa, gilubong sa Bantayan ang Santa Fe Seafarers, 83-58 sa engkuwentro tali sa taga-isla.
Nagkagidlay ang opensa sa Boljoon hinungdan nga nalimitahan ngadto lamang sa kuwatro puntos sa unang kuwarter, samtang ang Alcoy mitali og 19.
Miresbak man tuod ang Boljoon sa ikaduhang kuwarter, apan wala sab magpaalkansi ang Alcoy hinungdan nga nakamintinar kini og 14 puntos nga labaw sa halftime, 37-23.
Mipakita og maayong labok ang Boljoon sa second half, apan ang Alcoy kalmado kaayong naglawig ngadto sa siyete puntos nga daog.
Sila si Hance Kervin Estrera ug John Vic Olores maoy nangu sa Alcoy bitbit ang 14 puntos matag usa, samtang si Carl Angelo Vitor miamot og 10 puntos.
Sila si Carlo Binagatan ug Asterio Glodove Jr. dunay 12 puntos kada usa alang sa Boljoon, samtang si Perseus Jeff Tanilon mihipos og 10 puntos sa pilderong koponan.
Ang tulo ka bulan nga torneyo gipasiugdahan sa Cebu Provincial Sports Commission (CPSC). (BANAT NEWS)
- Latest
