‘Sangguniang Kabataan poll winners sanayin sa government accounting laws’ - Joy Belmonte
MANILA, Philippines — Dapat isalang sa seminar ang mga mananalong kandidato sa halalan sa Sangguniang Kabataan (SK) - lalo na ang mga “first-timers” – tungkol sa government financial system.
Ito ang sinabi ni Quezon City Vice mayor Joy Belmonte dahil dapat anyang maging rekisitos ito sa lahat ng mga opisyal ng SK dahil hahawak sila ng pondo ng pamahalaan.
“Dapat meron silang pagsasanay sa tamang accoun-ting at pangangasiwa sa pera at administrasyon kabilang ang mga kinauukulang batas. Dapat batid nila kung paano pumasok sa mga kontrata at tamang paggamit ng pondo ng gobyerno para hindi sila nadidiktahan ng matatanda,” paliwanag ni Belmonte.
Bukod pa sa pagkakaroon ng kaalaman sa pananalapi ng pamahalaan, dapat din aniyang maimulat sa mga kabataang lider sa kahalagahan ng accountability at transparency.
Tiniyak din ni Belmonte na suportado niya ang pamahalaan sa patuloy nitong kampanya na linisin ang hanay ng SK na nasasangkot pa rin sa iba’t ibang isyu ng katiwalian.
“Sa mga kabataan, we really have to work on their idealism and to the barangay officials, they should really set a good example to these youth leaders,” diin ni Belmonte.
Ayon pa rito, mahalaga ring mabigyan ang mga taga-SK ng “project menu” na nakasaad ang mga proyekto at programang mas dapat nilang pagtuunan ng pansin.
Una nang inanunsyo ni Belmonte na magsasagawa siya ng seminar para sa mga kabataang nagnanais tumakbo sa halalan sa SK sa darating na Mayo.
Ayon kay Belmonte, panahon na upang gumawa ng paraan ang lokal na pamahalaan upang malinis ang hanay ng SK at mailayo ito sa katiwalian.
- Latest