SSS service office gibuksan sa Poro

CEBU, Philippines — Hingpit nang gibuksan niadtong Martes, Abril 10 ang bag-ong service office sa Social Security System (SSS) nga nahimutang sa Poblacion Public Market sa Lungsod sa Poro, Camotes Islands, Subay sa pag-abli sa maong bag-ong buhatan, gidalit dayon sa SSS ang mga serbisyo sama sa paghatag og SSS number, online nga pagsusi o pagpangutana mahitungod sa membership records, Benefit Claims and Loan Application Status, Eligibility for Benefit Claims, Posting of Contribution Payments ug Loan Repayments. Aduna say Screening ug Evaluation alang sa Benefit Claim Applications, Initial Loan Applications and Loan Rewards, Membership Application ug Data Amendment Application. Lakip usab sa gitanyag nga serbiyso mao ang paghatag sa SSS Forms ug Annual Confirmation of Pensioner (ACOP).

Ang maong sanga sa SSS natukod niadto pang tuig 2015 apan niining tuiga lang nahatagan og pagtugot nga makahatag og serbisyo sugod Lunes hangtud Biyernes gikan sa alas otso sa buntag hangtud sa alas singko sa hapon.

Gumikan sa maong kalambuan, mas sayon na lang sa mga taga Camotes ang pagproseso o pag-file sa ilang nagkadaiyang aplikasyon ug uban pang serbisyo nga gitanyag sa maong ahensiya. (Niña Mae P. Salvacion, CNU Intern/DILT) (BANAT NEWS)