Mga pasangil bahin sa donasyon para sa NOAH gipadaplin una

CEBU, Philippines — Dili una tagdon ni Cebu City Vice Mayor Michael Rama kining mga alegasyong gipasangil batok kaniya ug kang kanhi konsehal ug karon Noah Complex manager Joy Pesquera kabahin sa ‘transparency’ sa mga donasyon para sa maong pasilidad.

Gusto ni Rama nga unahon pagtutok ang problema sa mga Sugboanon, ang novel coronavirus disease (COVID-19).Ang Noah Complex mao ang kanhi Big Foot Studios nga gikombertir ngadto sa nag-inusarang isolation facility sa siyudad alang sa mga asymptomatic patients , gawas lang sa mga eskuylahang gihimong barangay isolation centers.

Si Rama  maoy chairman on the Committee on Health  sa siyudad, miingon nga mas maayo pang gamiton niya ang iyang panahon sa pagpangita og solusyon batok aning pandemic.

“Bottom line, there are more pressing matters than to focus on this so-called people who are there whose intentions are malicious. We will just in the meantime, shelve it. There will be an appropriate time for that,” dugang pang Rama.

Si NOAH Complex’ manager Joy Pesquera miingon nga kasong libelo ang nagpaabot sa mga tawong malisyosong namasangil kanila og kahiwian.

“Naa pa tay mas importante nga atimanon. Anyway ang libel, dugay pa man na iyang prescription. Nakaila man pud ko sa person, it’s not difficult to locate him because I know him personally,” matud s Pesquera, kinsa sama ni Rama, abogado sab.

“I just want to put on record lang sad nga here in NOAH, wala gyud koy gi accept nga funds from the donors,” matud ni Pesquera kinsa mibutyag nga gigamit pa gani niya ang iyang personal nga kwarta, hinuon kadaghanan sa mga donors mga materyales ray ihatag.

Ang NOAH Complex palapdan sugod karong adlawa samtang ang Aboitiz Power modonar sab og 400 ka tents, kada tent mapasilongan og upat ka pasyente subay sa rekisito sa DOH.

Sa miaging semana, si Cimatu mirekomendar sa pagpabalhin sa tanang COVID asymptomatic patients gikan sa mga BICs ngadto na sa NOAH Complex tungod kay kadaghanan duol ra kaayo kini sa mga kabalayan.

Sa pagkakaron, dunay kapin sa 100 ka pasyenteng asymptomatic ang gibutuang sa maong pasilidad. The Freeman/IBM