CHR naalarma sa banat ni Gwen sa netizens

CEBU, Philippines — Naalarma ang Commission on Human Rights sa giingong pagpakauwaw ni Gobernador Gwendolyn Garcia sa usa ka netizen nga nikomentaryo batok kaniya sa social media.

Ang tigpamaba sa CHR nga si Atty. Jacqueline Ann de Guia nipagawas og pamahayag kalabot niini.

“It is a cause of concern for CHR especially that some information of the commenter were disclosed to the public, including her full name, barangay of residence, and relationship history among others. The Governor even made personal remarks on the physical appearance of the woman based on the photos posted on her Facebook account,” tipik sa pamahayag ni de Guia.

Sa iyang Facebook live streaming niadtong Mayo 18, si Garcia nitawag sa usa ka netizen nga taga Dakbayan sa Carcar nga nikomentaryo sa Sugbo News kalabot sa pagtakli sa Probinsiya sa Sugbo gikan sa Enhanced Community Quarantine ngadto sa General Community Quarantine.

Sa komentaryo sa maong babaye nga netizen, nagkanayon kini nga tungod kay GCQ na ang probinsiya wala nay “second wave” sa madawat nga ayuda gikan sa gobiyerno.

“Nagpasikat lage ang Cebu sa pwerting kurakot ang mga tawo gipang gutum na nya wa pay saktong ayuda,” pagbasa komentaryo sa maong netizen.

Si Garcia wala kauyon sa komentaryo sa maong netizen ilabi na nga nisulti kini og “kurakot” ug “bogo”. Gibutyag ni Garcia ang pangalan sa maong netizen ug personal nga background niini.

Si Garcia nagkanayon nga ang impormasyon nga iyang nakuha gihatag sa barangay health worker sa Dakbayan sa Carcar.

Ang CHR nipahimangno sa mga opisyal sa gobiyerno, pinili man o tinudlo, nga “bound” sila sa “high standard” sa ethics sa public service.

“They must perform their duties with utmost responsibility integrity, and respect and shall be accountable to the people they are serving,” pagbasa sa pamahayag sa CHR.

Dugang pa niini nga si Garcia isip “duty bearer” nitubag unta sa komentaryo pinaagi sa makiangayon ug professional nga pamaagi ug nigamit sa iyang platform pagtataw sa isyu inay mopakauwaw ug personal nga mangatake.

Apan si Garcia nagkanayon nga katungod sa CHR nga mo-react. “So long as they don’t also resort to calling us ‘bogo’, ‘kurakot’ and ‘nagkiat’, to mention just a few of the names these netizens wantonly post,” matud ni Garcia.

Si Garcia nangutana kun wala ba usab maalarma ang CHR sa maong mga libelous nga mga posts sa mga netizens.

Siya nagkanayon nga ang mga public officials ug netizens pareho ra nga tawo.

“Shouldn’t we both be entitled to the same human rights that the Commission on Human Rights has vowed to protect? Something like equal protection before the law?” matud ni Garcia. Lorraine Ecarma/The Freeman